2014-2015 оны хичээлийн жилд МУИС-ийн бакалаврын хөтөлбөрт шинээр оюутан элсүүлэх хяналтын тоо батлагдлаа.
Проф. О.Мөнхбат. сургалт эрхэлсэн дэд захирал
Ирэх хичээлийн жилд шинээр элсүүлэх оюутны тоо:
МУИС ирэх хичээлийн шинэ жилд өөрийн бакалаврын хөтөлбөрүүдэд нийт 4245 элсэгчийг УБ болон хөдөө орон нутгаас элсүүлэн суралцуулна. Энэ жил МУИС өнгөрсөн онд элсүүлсэн оюутны тооноос харьцангуй илүү оюутан элсүүлэх болж байна. Ер нь энэ хавар ерөнхий боловсролын сургууль төгсөгчдийн тоо өмнөх жилээс даруй 20 хувиар буурсан бөгөөд БШУЯ ны зүгээс их дээд сургуулиудын өмнөх жилийн элсэлтийн тооноос 20-оос доошгүй хувиар бууруулж хяналтын тоог баталсан. Харин МУИС-ийн хувьд инженерчлэлийн хөтөлбөрүүд шинээр нээсэн, бүтцийн өөрчлөлт хийж байгаа зэрэг хүчин зүйлээс үүдэн ийм боломж гарлаа. 12 жилийн сургалтанд шилжиж буйтай холбогдон 2015-2016 оны хувьд ЕБС төгсөгчдийн тоо бараг 50 хувиар буурах тооцоо гарч байгаа. Тиймээс бид энэ эрсдлийг урьдчилан тооцож, эртнээс бэлтгэлтэй байх чиглэлээр анхааран ажиллаж байна.
Энэ удаагийн элсэлтийн шалгалтын онцлог:
Энэ удаагийн элсэлтийн онцлог бол тодорхой нэг мэргэжилд шууд элсүүлэхгүйгээр бүрэлдэхүүн сургуульдаа оюутан элсүүлэх бөгөөд дээд боловсролын мэдлэг ур чадвар олгох ерөнхий суурь хичээлийн 30-аас доошгүй багц цаг (2 улирал) судалсаны дараа оюутнууд сурлагын амжилт болон элсэлтийн шалгалтын дундаж оноо зэрэг үзүүлэлтээр эрэмбэлэн жагсаж тухайн бүрэлдэхүүн сургуулийн санал болгож байгаа бүхий л мэргэжлээс сонгох боломжтой болох юм. Оюутан хэдий чинээн сайн суралцана төдийчинээн өргөн сонголт хийх боломжтой болно.
Түүнчлэн тодорхой нэг мэргэжлээр суралцуулах оюутны тоог бид шинжлэх ухааны хөгжлийн шаардлага, хөдөлмөрийн зах зээлийн эрэлт хэрэгцээ, багшлах боловсон хүчин зэрэг олон үзүүлэлтээс үүдэн тогтоох бөгөөд ингэснээр хөтөлбөрүүдийн хооронд эрүүл өрсөлдөөн бий болох нөхцөл бүрдэж, тэр хэмжээгээрээ сургалтын чанар сайжирна гэж төлөвлөж байна. Суурь шинжлэх ухааны зайлшгүй шаардлагатай мэргэжлүүдийг хөгжүүлэх нь ойлгомжтой бөгөөд эдгээр чиглэлээр сурч байгаа оюутнуудад тэтгэлэг олгох зэрэг олон талт арга хэмжээгээр дэмжих болно. Үүний зэрэгцээ мэдээж мэргэжлийн тэнхим багш нар оюутанд чанартай сургалт, сонирхолтой хэрэгцээтэй хичээлүүдийг санал болгож, судалгаа шинжилгээ хийх боломж бололцоог нээж өгч байж оюутан татна шүү дээ.
Түүнчлэн элсэлтийн бүртгэлийг бид олон хувилбартай хийж байгаа бөгөөд ингэснээр элсэгч сонголт хийх боломжтой болохын зэрэгцээ МУИС-д элсэгчдийн чанар ч өсөх юм.
