Салбартаа амжилттай яваа МУИС-ийн ЭЗС-ийн хэсэг төгсөгчдийн өөрсдийн халаа, ид суралцаж буй дүү нартаа Сангийн яамнаас 12 төрлийн номыг хандивлах санаачилгыг дэмжиж, МУИС-ийн Оюутанд үйлчлэх төв, ОХ-ны гишүүдийн хамтаар өнөөдөр “Номтой оюутнууддаа” мэргэжлийн чиглэлээрх 1000 номыг мэдлэг оюунд нь хандив өргөн, тараалаа.
Энэ арга хэмжээнд ЭЗ-ийн ангийн оюутнуудаас гадна ШУС, ХШУИС, Хуульзүйн сургуулийнхан зорин ирж, “Номтой оюутан” өдөрлөгийн эхний хэсэг өндөрлөж, ном тараах цаг болсныг дуулгамагц, биенээсээ өрсөн хураалттай ном руу хошууран орохыг үзээд эрхгүй бахдах сэтгэл төрсөн. 2 цаг үргэлжлэх төлөвлөгөөтэй арга хэмжээ хормын төдийд өндөрлөх болсны шалтгааныг тодруулбал, өнөөдрийн хандивлагдаж буй номнууд өөр мэргэжлийн оюутнуудын хичээл, даалгавартай ямар нэгэн байдлаар уялддаг гэнэ. Номын цуглуулгаа баяжуулж, салбарын мэдлэгээ дээшлүүлнэ гэлцлээ. Хандиваар ирсэн номын жагсаалтад
o Төсвийн хууль, тогтоомж I, Сангийн яам, 2013
o Төсвийн хууль тогтоомж II, Сангийн яам, 2013
o Монгол улсад зээл, тусламжийн тогтолцоо бүрэлдсэн нь, Сангийн яам, 2013
o Монгол улсын нягтлан бодох бүртгэлийн товч түүх
o Монгол улсын санхүүгийн товч түүх
o Хааны сангаас хөгжлийн сан, Сангийн яам
o Монгол улсын сангийн яам /Эх түүх/ 2007, 2008
o Төсвийн тухай хуулийн сургалт, Сангийн яам
o Сангийн яам ба Цэндийн Молом, Сангийн яам, 2012
o Амьдрал, бодол, Д.Содном
o Бодол, эргэцүүлэл, Д.Содном
o Асуулт хариулт, Сангийн яам , 2011 багтаж, хэн овсгоотой, сүйхээтэй байсан нь цөөн тооны бөгөөд ховроос нь авч чадлаа.
Хандивын ном тараах ажиллагаа оюутнуудын үнэмлэхийг шалган, товч мэдээллийг нь тэмдэглүүлэн авч үлдсэний дараагаар чөлөөтэй сонгуулах байдлаар явагдсан юм.
ЭЗС-ийн төгсөгчид, ОХ-ны гишүүний үүрэг ч гэлээ сайн дурын шинж чанартай энэ албанд харамгүй зүтгэдэг оюутнууд болон алба, үүрэг, сэтгэлээрээ тэдэнтэй холбогдсон ОҮТ-ийн Энхжаргал Б, өнөөдрийн үйл хэргийг бүтээхэд хамааралтай оролцсон бүх хүмүүсийн цаашдын ажил үйлс дэлгэрэх нь дамжиггүй ээ.
