МУИС 2015-2016 оны хичээлийн жилийн бакалаврын өдрийн хөтөлбөрийн элсэлтийн бүртгэлийг 2015 оны 4-р сарын 27-ноос эхлэн http://burtgel.num.edu.mn хаягаар орон даяар онлайнаар явуулж буйтай холбоотойгоор энэхүү сурталчилан таниулах ажлаар 2015 оны 4-р сарын 24-27-ны хооронд Сургалтын нэгдсэн албаны мэргэжилтэн Б.Наранцогт, Д.Мөнхбат нар Дундговь, Өмнөговь аймагт ажиллаад ирлээ.
Үүрэгт ажлынхаа хүрээнд Дундговь аймгийн Боловсрол, соёлын газраас зохион байгуулсан “Open mind-Боловсролын яармаг 2015”-д оролцож тус аймгийн ЕБС-ийн төгсөх ангийн 400 гаруй сурагчид, МСҮТ-ийн төгсөх ангийн хүүхдүүд болон эцэг, эхчүүд, багш нарт МУИС-ийн танилцуулга болон Элсэлтийн журам, онлайнаар бүртгүүлэх заавар зэргийг танилцуулж төгсөгчдийн сонирхсон асуултад хариулжээ.
Мөн Өмнөговь аймагт Улаан бурхан өвчин гарсантай холбоотой олон нийтийн үйл ажиллагаа зохион байгуулахыг хориглосон байсан учир аймгийн төвийн ЕБС-ийн 1, 2, 3, 4-р сургуулиудаар явж нийт төгсөх ангийн 370 гаруй хүүхдүүд болон багш нарт МУИС-ийн танилцуулга болон Элсэлтийн журам, онлайнаар бүртгүүлэх заавар зэргийг танилцуулж төгсөгчдийн асуултад тус тус хариулжээ. Түүнчлэн тус аймгийн сумдын ЕБС-ийн сургалтын менежерүүдэд элсэлтийн танилцуулга, видео тараах материалыг Боловсрол, соёлын газрын даргаар дамжуулан хүргүүлэх зэрэг ажлуудыг зохион байгуулахад МУИС элсэлтээ орон даяар онлайнаар авснаар бүх мэдээлэл ил тод, шударга зарчмаар цаг хугацаа, зардал мөнгө хэмнэсэн томоохон ажлын анхдагч боллоо хэмээн Боловсрол, соёлын газар болон багш, эцэг эхчүүд сайшаан хүлээн авчээ.
МУИС-ийн элсэлтийн үйл явц бүхэлдээ онлайнаар явагдах бөгөөд элсэхийг хүссэн бүх төгсөх ангийн сурагчид Боловсролын үнэлгээний төвийн системд ханддаг бүртгэлийн дугаар, нууц үгээрээ нэвтэрч бүртгүүлнэ. Бүртгэл нь http://burtgel.num.edu.mn/-ээр явагдах бөгөөд зааврын дагуу үйлдлүүдээ дэс дараатайгаар хийж гүйцэтгэнэ.
Заавар
