МУИС-ийн Күнзийн Институтын Монголын талын захирал М.Чимэдцэеэ дэлхий дахины Күнзийн Институтын 2011 оны “Шилдэг хүн”-ээр шалгарч, “Мөнгөн медаль”, “Хүндэт өргөмжлөл” хүртлээ. Энэ сарын 11-14-ны өдрүүдэд Бээжинд хуралдсан Дэлхийн Күнзийн Институтын VI их хурлын үеэр энэхүү шагналыг БНХАУ-ын удирдагчдын нэг-ХКН-ын Төв хорооны Улс төрийн товчооны байнгын гишүүн Ли Чанчүнь түүнд гардуулсан байна. Уг медалийг цалин цагаан мөнгөөр урласан байна.
Өнөөдөр 105 улсад Күнзийн 350 Институт, 500 гаруй танхим ажилладаг бөгөөд жил бүрийн сүүлчээр Бээжин хотод дэлхийн өнцөг
булан бүрээс төлөөлөгчид нь хуран чуулж, тухайн оны шилдэг 20 хүнийг шалгаруулдаг журамтай аж. “Оны дэлхийн шилдэг хүн”-ийг хятад болон гадаадын нэр хүнд бүхий гишүүдээс бүрдсэн шүүгчдийн тусгай баг Бээжин дэх Күнзийн Институтын тусгайлан нэр дэвшүүлсэн хүмүүсээс сонгон шалгаруулдаг байна. Энэ жилийн “Дэлхийн шилдэг хүн”-ий шагналыг Монголоос гадна БНХАУ, АНУ, Англи, Япон, Сингапур, БНСУ, Норвеги, Мажар, Вотсван зэрэг орны Күнзийн Институтын захирал хүртжээ.
