Монгол Улсын Их Сургуулийг бодлогын болон шаардлагатай дэмжлэг, туслалцаагаар хангана
УИХ, Засгийн газрын гишүүн, Боловсрол, соёл, шинжлэх ухаан, спортын сайд Ц.Цогзолмаа Монгол Улсын Их Сургууль дээр өнөөдөр /2017.12.05/ ажлын уулзалт хийж тус сургуулийн үйл ажиллагаатай танилцлаа. МУИС-ийн захирал, доктор Я.Төмөрбаатар, МУИС-ийн ТУЗ-ийн дарга, академич Д.Рэгдэл, МУИС-ийн Сургалт, оюутан хариуцсан дэд захирал Б.Очирхуяг, МУИС-ийн Захиргаа, дотоод хамтын ажиллагаа хариуцсан дэд захирал Ч.Ундрам, Захиргаа, хүний нөөцийн газрын дарга Г.Эрдэнэбаяр нар сайд болон бусад төлөөлөгчдийг хүлээн авч, МУИС дээрх ажлын уулзалтын хөтөлбөрийг танилцуулсан юм. Энэ үеэр МУИС-ийн захирал, доктор Я.Төмөрбаатар, МУИС-ийн ТУЗ-ийн дарга, академич Д.Рэгдэл нар тус сургуулийн бүтцийн өөрчлөлтийн талаар мэдээлэл өгч, сайдтай зөвшилцсөн бөгөөд МУИС-ийн бүтцийн өөрчлөлтийг багш, ажилчдын дунд хэлэлцүүлэг явуулж, 2017-2018 оны хичээлийн жилийн төгсгөлд хийхээр тогтлоо.
БСШУС-ын сайд Ц.Цогзолмаа болон холбогдох албаны хүмүүс МУИС-ийн Хичээлийн VI байр буюу актлагдсан байр, МУИС-ийн Хичээлийн IV байрны ар талд шинээр баригдаж буй спорт цогцолборын барилгын явцтай газар дээр нь үзэж танилцсан юм.
Дараа нь шинээр баригдан ашиглалтад ороод буй МУИС-ийн Номын сангаар зочилж уншлагын танхим, Брэнд дэлгүүр, лабораториуд, хурлын танхим, Эрдмийн музейгээр зочилж Хүндэтгэлийн дэвтэрт дурсгалын үг үлдээв. Мөн энэ үеэр БСШУС-ын сайд Ц.Цогзолмаа МУИС-ийн Эрдмийн музейд их сургуулийн түүхийг харуулах видео сэлтийг тогтмол үзүүлж байх дэлгэц бэлэглэхээр боллоо.
Монгол Улсын Их Сургуулийн “үндэсний” статусыг хамгаална
Түүний дараа МУИС-ийн захирал, доктор Я.Төмөрбаатар, МУИС-ийн дэд захирлууд, МУИС-ийн бүрэлдэхүүн сургуулийн захирлууд болон бусад газар, хэлтэс, албадын дарга нартай сайд уулзалт хийн тулгамдаж буй асуудлууд, ойрын хугацаанд хийхээр төлөвлөж буй ажлуудтай танилцаж санал солилцон УИХ, Засгийн газраас тус сургуульд үзүүлэх тусламж, дэмжлэгийн талаар ярилцав.
Уулзалтад МУИС-ийн захирал, доктор Я.Төмөрбаатар үг хэлэв. Тэрбээр “Үндэсний ууган их сургуулийн хувьд бид Монгол Улсын оюуны тусгаар тогтнолын баталгаа болж ажилладаг. Монгол Улсын Их Сургууль Азийн шилдэг 100 их сургуулийн нэг болох, Цахим их сургууль болох, Судалгааны их сургууль болох, багш нарынхаа оюуны бүтээлийн үнэлэмжийг дээшлүүлэх, манай хичээлийн хөтөлбөрүүд олон улсад магадлан итгэмжлэгдэж дэлхийн түвшинд үнэлэгддэг болох зэрэг олон зорилтыг тавин ажиллаж байна” гээд тус сургуулийн статусыг хууль, эрх зүйн орчны хувьд баталгаажуулах, төрийн өмчийн их, дээд сургуулиудад төрөөс үзүүлж буй дэмжлэгийг ажлын үр дүн, ахиц, дэвшилтэй уялдуулан ялгамжтай үзүүлэх зэрэг олон ажил хэрэгч саналыг сайдад уламжилсан юм.
Боловсрол, соёл, шинжлэх ухаан, спортын сайд Ц.Цогзолмаа хэлсэн үгэндээ “Монгол Улсын хөгжлийг сүүлийн 75 жил түүчээлэн авч яваа боловсон хүчний дийлэнх нь МУИС-ийн эрдэмтэн багш, төгсөгчид гэж би ойлгодог. Бид дээд боловсролын тогтолцоогоо үнэлэх, дүгнэх цаг болсон. Энэ ажлын цөмийг МУИС гүйцэтгэнэ. Боловсрол, соёл, шинжлэх ухаан, спортын яам үндэсний, ууган их сургуулиа түшиж ажиллах болно. Миний зүгээс эхний шийдвэрээ МУИС-ийн “үндэсний” статусыг хамгаалах чиглэлд гаргах болно. Яагаад гэвэл үндэсний боловсон хүчнийг бүх салбарт бэлтгэдэг учраас тусгайлан үндэсний гэх статусыг хамгаалж авч явах учиртай. Гадны олон орны жишээг та бүхэн мэднэ. Тухайлбал, Японд Токиогийн их сургууль, БНХАУ-д Синьхуа их сургууль гээд үндэснийх нь их сургууль тухайн үндэстнийхээ боловсон хүчний нөөцийг бэлтгэдэг. Монгол Улсын боловсон хүчний нөөцийг бэлтгэдэг сургуулийнхаа статусыг хамгаалах, бодлогоор дэмжихэд манай яамны зүгээс онцгойлон анхаарах болно. Шийдвэрлэх ёстой асуудлуудыг үе шаттайгаар шийдвэрлэнэ. Үүний хүрээнд сайдын зөвлөлийг байгуулж байгаа. Энэ зөвлөлд МУИС-ийн захирал, доктор Я.Төмөрбаатар орно. Дээд боловсролын тогтолцоог үнэлэх, дүгнэх, шинэтгэх ажилд МУИС-ийн эрдэмтэн багш нарын саналыг авах хүсэлтэй байгаа юм. Боловсрол, соёл, шинжлэх ухаан, спортын яамнаас МУИС-ийг Азийн шилдэг их сургууль, цаашлаад дэлхийн шилдэг их сургууль болоход бодлогын болон бусад шаардлагатай дэмжлэг, туслалцааг өгөх болно” гэв.
Ийнхүү Боловсрол, соёл, шинжлэх ухаан, спортын сайд Ц.Цогзолмаа их, дээд сургуулиудын үйл ажиллагаатай танилцах уулзалтаа Монгол Улсын ууган их сургуулиас эхлүүллээ.
