Ховд Их Сургуулийн эрдэмтэн багш, ажилтан, албан хаагчдаас бүрдсэн 22 хүний бүрэлдэхүүнтэй баг МУИС-тай танилцаж, Шинэ номын сан, Байгаль-Эх лицей ахлах сургуулиар зочиллоо.
Мөн Лазерын лабораторийн нээлтэд оролцож, туршлага судлах санал солилцох уулзалт зохион байгуулсан юм.
Уулзалтын үеэр МУИС-ийн Захиргаа, дотоод хамтын ажиллагаа хариуцсан дэд захирал Ч.Ундрам “ХИС-ийн хамт олон манай сургуулийн үйл ажиллагаатай танилцаж байгаад баяртай байна. ХИС бол МУИС-аас салбарлаж гарсан манай хамт олны нэг хэсэг билээ. Цаашид хамтын ажиллагаагаа өргөжүүлэн багш эрдэмтэн, оюутан суралцагч, төгсөгчдийн хүрээнд МУИС-ийн зүгээс нягт хамтран ажиллах болно” хэмээлээ.
ДХАОНХХ-ийн дарга П. Лхамсүрэн “манай хэлтэс 21 аймгийн ЗДТГ-тай хамтын ажиллагааны гэрээ байгуулж ажиллаж байгаа. Тус гэрээний хүрээнд Ховд аймаг болон танай сургуулийн хамт олонтой хамтран ажиллаж, цаашдын харилцаа холбоог өргөжүүлэх болно” гэсэн юм.
Харин ХИС-ийн Сургалт хариуцсан захирал Б.Нямдорж “Манай аймагт шинэ номын сан байгуулах төсөл хэрэгжиж байгаа бөгөөд 2018 оны хичээлийн жилд “Лицей ахлах сургууль”-тай болсон. Тийм учраас МУИС-аас туршлага судалж байгаа нь бидний ажилд түлхэц болж өгөх юм. Мөн манай багш ажилчид өөрийн салбарын дагуу эрдэмтэн багш нартай холбоо тогтоож цаашдын сургалт судалгаа, ардмийн бүтээл, ажил хэрэгт зөвлөгөө авч санал солилцож, хамтрах болсонд таатай байна” гэв.
