Монгол Улсын Их Сургуулийн удирдлага, багш, ажилтан, ахмадууд XVII жарны “Тийн унжлагат” хэмээх шороон нохой жилийн сар шинийн золголтоо хийлээ.
МУИС-ийн золголтод Монголын Бурхан шашинтны төв Гандантэгчинлэн хийдийн тэргүүн хамба Д.Чойжамц оролцож нийт багш, ажилтнуудад мэндчилгээ дэвшүүлж хэлсэн үгэндээ “Монгол түмний эрдэм боловсролын эх, уурхай болсон энэ сургуулийн сар шинийн золголтод оролцож буйдаа билэгшээж байна. Би энэ жилийг нэг зүйл шинээр эхэлж байна гэж ажиглаж байгаа. Гадны улс орныг сайхан гэж шууд дуурайн хийдгээ байж улам нарийн судалж шинжилдэг болж байна. Би шороон нохойн жилийг бие биенээ магтдаг, сайшаадаг жил хэмээн уриалж байгаа юм. Бие биенийхээ сайн, сайхан талыг харж, магтан сайшаадаг болцгооё” хэмээгээд шороон нохойн жилийн өнгө сайхан байна, ажил төрөл нь үргэлж өөдөө байхыг ерөөв.
МУИС-ийн захирал, доктор Я.Төмөрбаатар их сургуулийн нийт багш, ажилтнуудад мэндчилгээ дэвшүүлэн ерөөл хэлээд энэ жил 92 насны сүүдэр зооглож буй МУИС-ийн ахмад багш Чилхасүрэнгээр ууц, шүүс хөндүүллээ.
