Монгол Улсын Их Сургуулийн зарим багш, ажилтнуудын хөдөлмөр, бүтээлийг төр засгаас үнэлэн төрийн дээд одон, медалиар шороон нохой жилийн босгон дээр шагнасан бөгөөд өнөөдөр /2018.02.22/ МУИС-ийн захирал, доктор Я.Төмөрбаатар, Эрдэм шинжилгээ, инноваци, гадаад харилцаа хариуцсан дэд захирал Б.Очирхуяг, Захиргаа, хүний нөөцийн газрын дарга Г.Эрдэнэбаяр, ХЗС-ийн захирал Ж.Эрдэнэбулган нар шагнал хүртсэн багш, ажилтнуудыг хүлээн авч уулзан хүндэтгэл үзүүллээ.
МУИС-ийн захирал, доктор Я.Төмөрбаатар “МУИС-ийн 75 жилийн ойгоор манай багш, ажилтнууд хөдөлмөр, бүтээлээ үнэлүүлэн төрийн хайр хишгийг хүртсэнээс хойш шагналын буухиа тасраагүй байна. Өнөөдөр та бүхэн МУИС-ийн төгсөгчид, төр нийгмийн зүтгэлтнүүд, улсаа авч яваа чадварлаг боловсон хүчин бэлтгэсэн гавьяагаа үнэлүүлж эрхэм хүндтэй одон, медаль хүртлээ” гээд амьдралд нь аз жаргал, эрдмийн ажилд нь амжилт хүсэв.
Хөдөлмөрийн гавьяаны улаан тугийн одонгоор МУИС-ийн ХЗС-ийн Нийтийн эрх зүйн тэнхимийн эрхлэгч, профессор Д.Баярсайхан, ШУС-ийн Европ судлалын тэнхимийн ахмад багш З.Одмаа, Т.Амина нар, Алтан гадас одонгоор ХЗС-ийн Нийтийн эрх зүйн тэнхимийн профессор П.Одгэрэл, ХЗС-ийн Практик сургалтын төвийн эрхлэгч, дэд профессор Ж.Эрхэсхулан, ХЗС-ийн Хувийн эрх зүйн тэнхимийн туслах ажилтан Д.Цэрмаа, ШУС-ийн Гадаад хэлний төвийн дэд профессор Д.Энхбат, ШУС-ийн Гадаад хэлний төвийн ахлах багш С.Чимэд нар, Хөдөлмөрийн хүндэт медалиар ХЗС-ийн үйлчлэгч Г.Уранчимэг тус тус шагнуулжээ.
Төрийн дээд одон, медалиар шагнуулсан эрхэм багш, ажилтнууддаа аз жаргал, эрүүл энхийн ерөөл дэвшүүлье.
