Монгол Улсын Их Сургуулийн зарим багшийн хөдөлмөр, бүтээлийг төр засгаас үнэлэн төрийн дээд одонгоор шагнасан бөгөөд өнөөдөр /2018.03.23/ МУИС-ийн захирал, доктор Я.Төмөрбаатар, Сургалт, оюутан хариуцсан дэд захирал Б.Очирхуяг, Захиргаа, дотоод хамтын ажиллагаа хариуцсан дэд захирал Ч.Ундрам, Захиргаа, хүний нөөцийн газрын дарга Г.Эрдэнэбаяр, МУИС-ийн харьяа Байгаль эх лицей ахлах сургууль, Экологийн боловсролын төвийн захирал П.Түвшинтөр нар шагнал хүртсэн багш нарыг хүлээн авч уулзан хүндэтгэл үзүүллээ.
МУИС-ийн захирал, доктор Я.Төмөрбаатар “МУИС-ийн 75 жилийн ойгоор манай багш, ажилтнууд хөдөлмөр, бүтээлээ үнэлүүлэн төрийн хайр хишгийг хүртсэнээс хойш шагналын буухиа тасраагүй байна. Өнөөдөр та бүхэн чадварлаг боловсон хүчин бэлтгэсэн гавьяагаа үнэлүүлж эрхэм хүндтэй одон, медаль хүртлээ” гээд амьдралд нь аз жаргал, эрүүл энхийг хүсэв.
Хөдөлмөрийн гавьяаны улаан тугийн одонгоор МУИС-ийн харьяа Байгаль эх лицей ахлах сургуулийн зөвлөх, экологийн сургагч багш А.Чимэдцэрэн, Алтангадас одонгоор МУИС-ийн харьяа Байгаль эх лицей ахлах сургуулийн зөвлөх, жимсний аж ахуйч Д.Жаргал, МУИС-ийн ШУС-ийн БУС-ын Газар зүйн тэнхимийн дэд профессор П.Мягмарцэрэн нар тус тус шагнуулсан юм.
Төрийн дээд одонгоор шагнуулсан эрхэм багш нартаа аз жаргал, эрүүл энхийн ерөөл дэвшүүлье.
