МУИС-д суралцагч гадаад оюутнууд болон гадаад хэл, орон судлал, олон улсын харилцаа мэргэжлээр суралцаж байгаа оюутнуудын хамтын ажиллагааг сайжруулах, гадаад хэлний чадвар, сурах, хүсэл сонирхол, урлагийн мэдрэмж, авьяас бүтээлч сэтгэхүйг нээн хөгжүүлэх, сурч буй гадаад хэлээрээ өөрийгөө илэрхийлэх болон багаар ажиллах чадварыг сайжруулах, мэргэжлийн ур чадварыг нэмэгдүүлэх, улс үндэстний түүх, соёлыг сурталчлах зорилготой Олон улсын соёлын өдөрлөгийг 2018 оны 4 дүгээр сарын 9-ний өдөр зохион байгууллаа.
Өдөрлөгийн үйл ажиллагааг Оюутны хөгжил, үйлчилгээний газрын дарга Б.Алтангэрэл үг хэлж нээв. МУИС-д суралцаж байгаа БНСУ, БНАСАУ, БНАЛАУ, Япон, ОХУ, ХБНГУ, БНХАУ-ын оюутнууд болон ХУС –ийн Ази судлалын тэнхимийн хятад, япон, солонгос хэл-орон судлал ангийн оюутнууд, Европ судлалын тэнхимийн франц, герман хэл-орон судлал ангийн оюутнууд, Их Британи, Америк судлалын тэнхимийн оюутны төлөөлөл, ОУХНУС-ийн Дипломат клубын гишүүдтус өдөрлөгт идэвхтэй оролцож, өөрийн орны хэл соёлоо танилцуулан мэндчилж, “Даяаршил ба соёл” жүжигчилсэн тоглолт, урлагийн үзүүлбэрийг толилуулсан юм. Мөн арга хэмжээний үеэр гадаад оюутнууд өөрийн улсын тухай ханын сонин, тараах материал болон үндэсний хоол амттаныг бэлтгэн оролцож багш оюутныг дайллаа. Өдөрлөгт оролцогч багуудын дунд “Дэлхийн иргэн” асуулт хариултын тэмцээнийг явуулсан бөгөөд тэмцээнд бүгд жигд амжилтыг гаргалаа. Өдөрлөгийн арга хэмжээг хааж Оюутны хөгжил, үйлчилгээний газрын мэргэжилтэн Б.Буянханд үг хэлж, оролцсон багуудад дурсгалын зүйлс, гэрчилгээг гардуулан өгсөн юм.
- Шилдэг танилцуулгатай улсаар ӨМӨЗО
- Шилдэг жүжигчилсэн тоглолттой оролцогчоор солонгос хэлний ангийн оюутнууд
- Шилдэг улсаар БНАЛАУ -ын оюутнууд тус тус шалгарлаа.
Хамтран зохион байгуулсан Монгол хэл, хэл шинжлэлийн тэнхимийн багш нарт болон, ОУХНУС-ийн Дипломат клубын гишүүн хамт олонд оюутнуудын нэрийн өмнөөс талархал илэрхийлье.
