МУИС-ийн хамт олон ОХУ-д болох 2018 оны хөлбөмбөгийн дэлхийн аварга шалгаруулах тэмцээний мэдээллийг олон нийтэд таниулан сурталчлах, оюутан залуусын оролцоог хангах зорилготой өдөрлөгийг 2018 оны 4 дүгээр сарын 20-ны өдөр зохион байгууллаа. Өдөрлөгт хөлбөмбөгийн дэлхийн аварга шалгаруулах тэмцээнийг таниулан сурталчлах МУИС-ийн ажлын хэсэг, ОХУ-ын Элчин сайдын яам, Биеийн тамирын тэнхим, Оюутны хөгжил, үйлчилгээний газар, РЦНК /Оросын шинжлэх ухаан, соёлын төв/-ийн удирдлага, төлөөлөл оролцсон юм.
XXI дэх удаагийн дэлхийн аваргын тэмцээнийг таниулан сурталчлахад, олон нийтийг дэлхийн хамгийн олон үзэгчтэй хөл бөмбөгийн ертөнцөөр аялуулахад МУИС-ийн хамт олон манлайлан оролцоно.
МУИС нь 1942 онд байгуулагдахад декан, тэнхимийн эрхлэгч, багш нар нь бүгд ЗХУ-ын их сургуулиудаас уригдан ирсэн хүмүүс байсан бөгөөд цаашдын түүхэн хөгжил, хандлага нь хойд хөрштэйгээ салшгүй холбоотой байдаг. Түүнчлэн улс орны хөгжлийн тулгуур, мэдлэгийн цөм болсон үндэсний тэргүүлэх их сургуулийн хувьд нийгэмд чиглэсэн үйл ажиллагааныхаа хүрээнд оюутан залуусыг эрүүл мэнд, спортын аливаа үйл ажиллагаанд татан оролцуулахад Монгол Улсад хамгийн ойр, эртний, найрсаг хөрш ОХУ-д болох Дэлхийн аварга шалгаруулах хөл бөмбөгийн тэмцээнийг таниулан сурталчлахад тэргүүн эгнээнд манлайлан оролцох учиртай.
Тус өдөрлөгөөс бэлтгэсэн фото сурвалжлагыг сонирхоно уу.
