Экологийн боловсролын төвөөс Байгаль-Эх лицей ахлах сургуульд шинээр элссэн суралцагчдад зориулан явуулдаг танин мэдэхүйн уламжлалт өдөрлөг 8 дахь жилдээ зохион байгуулагдлаа. “Байгаль орчны боловсролыг байгальд нь” уриатай энэ удаагийн өдөрлөгт БЭЛАС-ийн 120 гаруй суралцагч, багш нарын хамт оролцов.
Танин мэдэхүйн өдөрлөгийг санаачлан зохион байгуулагч Др.Р.Сүнжидмаа өдөрлөгийн талаар “Энэ өдөр хүүхдүүд байгальд очиж, танин мэдэхүйн 12 өртөөгөөр аялан танхимын сургалтаар олж авсан мэдлэгээ бататгалаа. Хүүхдүүдийн аяласан өртөө болгон өөр өөрийн онцлогтой, өөр өөр өнгө аяс, өгүүлэмжтэй, өөр өөр багшаар удирдуулсан байв. Өртөөний нэг хэсэг мэдлэг олгоход чиглэгдэх бол нөгөө хэсэг нь байгалийг бүх мэдрэхүйгээр мэдрүүлэх, гурав дахь хэсэг нь тоглуулах аргаар байгалийн зүй тогтлыг таниулах зорилготой юм. Зарим өртөөг БЭЛАС-ийн 11-р ангийн хүүхдүүд удирдаж явуулдаг. Өмнөх жилийн аялагч суралцагчдаас шалгаруулан авч, энэ жилийн сургалтыг удирдуулан, хүүхдээр хүүхдэд багшлуулах аргаар сургалт аяллыг улам сонирхолтой, үр өгөөжтэй болгож байгаа. Бид өдөрлөгөө ийнхүү 8 дахь жилдээ амжилттай зохион байгууллаа. Оролцогч хүүхдүүдийн сэтгэгдэл ч мөн урьдын адил маш сайн байна” хэмээн мэдээллээ.
