NEXT зуны сургалт нь Европын Холбооны Erasmus+ Хөтөлбөр, Visegrad сан болон Германы Эрдмийн Солилцооны хөтөлбөр (DAAD)-ийн санхүүжилтээр 2018 оны 08 дугаар сарын 15-26-ны өдрүүдэд Бүгд Найрамдах Беларусь Улсын Могилев хотноо зохион байгуулагдлаа. Зуны сургалтанд 13 орны 40 гаруй хүн оролцсон бөгөөд Монгол улсаас МУИС болон Ховдын их сургуулийн багш, докторант нар тус тус төлөөлж оролцлоо. Төв Европын их сургууль, Чехийн ХААИС болон Беларусь-Оросын их сургууль зэрэг олон орны их сургуулиудаас 20 гаруй эрдэмтэн, профессор, докторууд оролцогчдыг удирдан чиглүүлэв.
ХШУИС, Хүрээлэн буй орчин, ойн инженерчлэлийн тэнхим
Тус сургалтын гол зорилго нь орчин цагийн ухаалаг хот төлөвлөхөд байгаль орчинд ээлтэй шийдэл олж, төслийн санал боловсруулах явдал байлаа. Уг зорилгын хүрээнд онолын мэдлэг эзэмшиж, судалгааны зургаан газарт очиж танилцан, багуудад хуваагдан ажиллахдаа тухайн газрын асуудлыг тодорхойлохын тулд оролцогч талуудтай уулзалт зохион байгуулж, боломжит төслийн саналыг багаар боловсруулав. Боловсруулсан төслийн саналыг оролцогч талуудад илтгэл тавин танилцуулж санал авсан бөгөөд цаашид улам сайжруулахаар ажиллаж байна. NEXT зуны сургалт нь мэдлэг, мэдээллийг үе шаттайгаар оролцогчдод олгосон, үр дүнтэй сургалт болж өндөрлөлөө.
