МУИС-ийн ОУХНУС-ийн Нийтийн удирдлагын тэнхим, бүрэлдэхүүн сургуулийн эрдэмтэн багш нар, АНУ, ХБНГУ-ын зочин профессоруудтай хамтран “Нийтийн удирдлагын үндэс” сурах бичгийг уншигчдад толилуулж байна. Энэхүү сурах бичиг монгол хэл дээр бичигдсэн нийтийн удирдлагын чиглэлээр хэвлэгдэн гарч буй анхны сурах бичиг бөгөөд 2014 оноос эмхэтгэн гаргахаар зорьсон билээ.
Сурах бичиг дараах үндсэн дөрвөн бүлэгтэй.
- Нэгдүгээр бүлэг: нийтийн удирдлагын онол, арга зүй;
- Хоёрдугаар бүлэг: нийтийн удирдлагын институц;
- Гуравдугаар бүлэг: нийтийн удирдлагын үйл явц;
- Дөрөвдүгээр бүлэг: нийтийн удирдлагын орчин үеийн хандлага.
Уг бүтээлийн зохиогчид нь Проф. Др. Н.Бурмаа; Проф. Др. Ц.Батболд; Проф. Др. Stefan Hanselmann; Проф. Др. Ulrich Andree; Проф. Др. John Duffy; Проф. Др. Г.Цэрэн; Докторант С.Ариунбилэг; Докторант Г.Баасанжав; Докторант Б.Баттогтох; Докторант Г.Мягмар; Докторант Н.Цэрмаа; Докторант Т.Ганчимэг нар болно. Мөн сурах бичгийн зөвлөхөөр ХБНГУ-ын Шпайерийн Нийтийн удирдлага судлалын төвийн захирал, МУИС-ийн хүндэт доктор Univ. Prof. Dr. Jan Ziekow зөвлөхөөр ажилласан.
Энэхүү бүтээлийг туурвихад мэдлэг чадвар оюуны ноу-хау, урам зориг, оюуны хөрөнгө оруулалт тогтмол хийн нийтийн удирдлагын хөтөлбөрийн сургалт, судалгаанд 2011 оноос зөвлөхүүдээр тасралтгүй ажиллаж буй ХБНГУ-ын Шпайерийн Нийтийн удирдлага судлалын төвийн захирал, МУИС-ийн хүндэт доктор Univ. Prof. Dr. Jan Ziekow; Германы олон улсын хамтын ажиллагааны нийгэмлэгийн(GIZ) Эрдэс баялаг, түүхий эдийн иж бүрэн санаачилга (IMRI)-ын захирал, тус хөтөлбөрийн үндэслэн байгуулагчдын нэг МУИС-ийн хүндэт доктор, Проф. Др. Stefan Hanselmann нарт онцгой хүндэтгэл бүхий талархал илэрхийлж байна.
Сурах бичгийг нийтийн удирдлагын чиглэлээр суралцаж буй оюутнууд болон энэ чиглэлээр эрдэм шинжилгээ, судалгаа хийн бүтээлээ туурвидаг үзэг нэгт нөхөд, төрийн албан хаагчид уншиж судлахад нээлттэй бөгөөд оюуны хөрөнгө оруулалтад нэмэр болох үүднээс хичээсэн болно. Тус бүтээлтэй холбоотой санал шүүмжлэлийг эерэгээр хүлээн авахад нээлттэй буйгаа илэрхийлэн номын цагаан буян дэлгэрэх болтугай хэмээн ерөөж байна.
МУИС-ОУХНУС
Нийтийн Удирдлагын Тэнхим
