2018 оны 12 дугаар сарын 20-ны өдөр БНСУ-аас Монгол Улсад суугаа эрхэмсэг элчин сайд ноён Жон Жэ Нам МУИС-д зочилж ОУХНУС, ШУС-ийн ХУС-ийн Ази судлалын тэнхимийн багш, оюутнуудад зориулж “Монгол-Солонгосын харилцаа: Өнгөрсөн, одоо, ирээдүй” сэдэвт лекц уншлаа.
Тэрбээр хоёр улсын ахан дүүгийн барилдлагат харилцаа эхэлсэн тангарагийн гэрээ тэртээ 800 жилийн өмнө зурагдсан талаар сонирхолтой түүхэн эх сурвалжийн талаар болон монгол, солонгос ард түмний соёл, заншлын хувьд ижил төсөөтэй зүйлсийн талаар жишээ татан ярив. Элчин сайд лекцийн үеэр оюутнуудаас өөрийн лекцтэй холбоотой асуулт асууж зөв хариулсан оюутанд гарын бэлгээ гардуулж өгсөн юм. Мөн тэрбээр БНСУ, Монгол Улсын өнөөгийн хамтын ажиллагаа олон салбаруудад идэвхтэй явагдаж байгаа талаар дурдаад хоёр улс өрсөлдөөн, сөргөлдөөнгүй түнш улсууд гэдгийг илтгэлийн үеэр онцолж байв. Мөн хоёр улсын гадаад худалдаа, зам тээврийн харилцаа, соёл боловсролын хамтын ажиллагаа улам өргөжин хөгжих ирээдүйтэй гэж дурдаад энэ бүхэнд залуусын оролцоо онцгой чухал гэдгийг тэмдэглэлээ.
Дипломат албанд олон жил зүтгэсэн тэрбээр Монгол Улсад томилогдон ажиллаж байгаадаа баяртай байдгаа хэлээд хоёр улсын боловсролын салбарын хамтын ажиллагааг улам бүр хөгжүүлэн ажиллана гэдгээ мэдэгдлээ. Лекцийн төгсгөлд багш оюутнууд БНСУ-руу зорчих визийн талаар, элчин сайдыг хэрхэн монгол хэл сурч буй талаар болон тус улсад тэтгэлгээр суралцахтай холбоотой өөрсдийн сонирхсон асуултуудад дэлгэрэнгүй хариулт авав.
Эрхэмсэг элчин сайд лекцийн дараа МУИС-ийн захирлын үүрэг гүйцэтгэгч Др. Я.Төмөрбаатарын өрөөнд саатаж түүх, Ази судлалын чиглэлээр хамтарсан олон улсын хурал зохион байгуулахад МУИС-тай хамтран ажиллах саналаа танилцуулсан байна. Др. Я.Төмөрбаатар саналыг хүлээн авч хамтран ажиллахад бэлэн буйгаа илэрхийлэв. Элчин сайд ноён Жон Жэ Нам 2018 оны 5 дугаар сарын 17-нд итгэмжлэх жуух бичгээ МУ-ын Ерөнхийлөгчөөс гардан авсны дараа хамгийн анхны албан уулзалтаа 6 дугаар сарын 5-ны өдөр МУИС-ийн захирлын үүрэг гүйцэтгэгч Я.Төмөрбаатартай хийж байжээ.
