МУИС-ийн Эрдмийн зөвлөлийн тэргүүлэгчдийн хурал 2019 оны 2 дугаар сарын 14-ний өдөр хуралдаж, МУИС-ийн Эрдмийн зөвлөлийн 2019 оны үйл ажиллагааны төлөвлөгөө, төсөв, 2019 оны эхний улирлын Эрдмийн зөвлөлийн ээлжит хурлын тов, хэлэлцэх асуудлыг баталлаа.
МУИС-ийн Эрдмийн зөвлөлийн үйл ажиллагааны журамд заасны дагуу Эрдмийн зөвлөл энэ жил 4-өөс доошгүй удаа хуралдан, МУИС-ийн холбогдох дүрэм, журмыг хэлэлцэн, үйл ажиллагаагаа идэвхжүүлэн ажиллахаар төлөвлөжээ.
Энэ оны эхний хурлыг 2019 оны 3 дугаар сарын 20-ны өдөр хийх бөгөөд тус хурлаар “МУИС-д профессор, багш ажиллуулах журам”, “МУИС-ийн Эрдмийн зөвлөлийн үйл ажиллагааны журам (үргэжлүүлж хэлэлцэнэ), АНУ-ын Пенсильванийн их сургуулийн профессор К.Этвүүдэд МУИС-ийн Хүндэт доктор цол олгох тухай /ЭЗ-ийн 2019.01.07-ны хуралдаанаар хойшлуулсан/ асуудлыг хэлэлцүүлэхээр тогтлоо. Эдгээр журмыг шинэчлэн боловсруулахад Х.Сэлэнгэ доктороор ахлуулсан Эрдмийн зөвлөлийн ажлын хэсэг өнгөрсөн хичээлийн жилээс ажиллаж эхэлсэн бөгөөд цаашид МУИС-ийн Сургалт, оюутан хариуцсан дэд захирал Б.Очирхуягаар ахлуулсан ажлын хэсэгтэй хамтран хэлэлцүүлэг явуулж, холбогдох дүрэм, журмын зүйл заалтын уялдаа холбоог сайжруулан, тооцоо судалгаанд үндэслэсэн, МУИС-ийн профессор багш нар, үйлдвэрчний эвлэлийн гишүүдийн саналыг тусган ажиллах шаардлагатай байгааг тэмдэглэв.
