ШУС-ийн Ази судлалын тэнхимийн япон судлалын салбар Япон Улсын The Japan Foundation (Япон Сан)-гийн “Хилийн чанад дахь япон хэлний сургалтын байгууллагыг дэмжих хөтөлбөр”-ийн хүрээнд 400,000 иенийн санхүүжилт бүхий 120 ширхэг ном сурах бичиг хүлээн авлаа.
Үүнд, бакалаврын түвшний суралцагчдад зориулсан япон хэлний уншиж ойлгох, найруулан бичих хичээлийн сурах бичиг, түвшин тогтоох шалгалтад бэлтгэх бүх түвшний гарын авлага, Японы түүх, улс төр, гадаад харилцаа, эдийн засаг, газар зүй, орон судлал, соёлын холбоотой сурах бичиг, аман ба бичгийн орчуулгын онол, арга зүйн хэрэглэгдэхүүн, түүнчлэн ахисан түвшний суралцагчдад зориулсан судалгааны арга зүй, хэрэглээний хэл шинжлэл, танихуйн хэл шинжлэл, соёл, шашин судлал, гадаад хэлний боловсрол чиглэлийн судалгааны ном хэрэглэгдэхүүн багтжээ.
Япон судлалын салбар 2010 оноос хойш 4 дэх удаагаа уг хөтөлбөрт хамрагдаж байгаа бөгөөд Япон улсаас үзүүлдэг энэхүү дэмжлэг нь Монгол Улс дахь япон хэлний сургалт судалгааг хөгжүүлэхэд үнэтэй хувь нэмэр оруулж байна.
