2021 оны Япон Улсын Засгийн газрын “Соёлын өвсний үндэс” буцалтгүй тусламжийн хүрээнд хэрэгжих “Монгол Улсын Их Сургуулийн япон хэлний хэлмэрчлэхүйн лаборатори байгуулах төсөл”-ийн гэрээнд Элчин сайд Х.Кобаяши болон Монгол Улсын Их сургуулийн захирал Б.Очирхуяг нар гарын үсэг зурлаа. Гэрээнд гарын үсэг зурах ёслолын ажиллагаанд МУИС-ийн Ази судлалын тэнхимийн эрхлэч, дэд профессор Ш.Эгшиг, Ази судлалын тэнхимийн Япон судлалын салбарын ахлах багш Т.Болдбаатар болон тус хэлмэрчлэхүйн тоног төхөөрөмжийг ашиглах япон судлалын салбарын багш нар оролцсон юм.
Элчин сайд Х.Кобаяши “Япон Улс, Монгол Улсын хооронд дипломат харилцаа тогтоосны 50 жилийн тэмдэглэлт ойн жил япон хэлний боловсролыг хамгийн олон жил олгож буй Монгол Улсын Их Сургуульд “Соёлын өвсний үндэс” төслийг хэрэгжүүлэх болсондоо баяртай байна. Цаашид Монгол Улсын Их Сургууль япон хэл, япон судлалын олон чадварлаг боловсон хүчнийг бэлтгэнэ гэдэгт найдаж байна” хэмээв.
Монгол Улсын Их сургуулийн захирал, доктор Б.Очирхуяг “Япон Улс, Монгол Улсын хооронд дипломат харилцаа тогтоосны тэмдэглэлт 50 жилийн ойн хүрээнд манай сургуульд энэхүү төсөл хэрэгжих болсонд таатай байна. Тус төслийн хүрээнд олгогдох тоног төхөөрөмжүүд япон хэлний оюутнуудын орчуулгын практик чадварыг улам сайжруулахад хувь нэмрээ оруулна гэдэгт итгэлтэй байна” гээд Монгол-Япон Улсын цаашдын хамтын ажиллагаа улам өргөжихийг хүслээ.
