“Могул Сервис энд Саппорт” ХХК нь анх үүсэн байгуулагдсан цагаасаа залуу үе, залуу инженерүүдийг дэмжиж, хамтран ажилласаар ирсэн. Энэ удаад тэд МУИС-ийн ХШУИС-ийн Электроник, холбооны инженерчлэлийн тэнхимийн сургалтад зориулан өөрсдийн ашиглаж байсан сервер болон бусад тоног төхөөрөмжүүдээ хандивлалаа. Их дээд сургуулиудын хувьд хөдөлмөрийн зах зээлд чадварлаг боловсон хүчин бэлтгэн гаргахад орчин үеийн төхөөрөмж бүхий лабораторийн орчин чухал ач холбогдолтой байдаг. Ирээдүйн чадварлаг инженерүүд төрөн гарах сургалтын орчинг бүрдүүлэхэд зориулан “Могул Сервис энд Саппорт” ХХК -аас хандивласан эдгээр тоног төхөөрөмжийн тусламжтайгаар оюутнууд практик мэдлэгээ бататгах, төгссөний дараа ажлын байранд гараад сервер болон бусад тоног төхөөрөмж дээр шууд ажиллах боломжтой болох юм.
Серверүүдийг МУИС-ийн Мэдээллийн Технологийн Сургуулийн 2005 оны Электроникийн ангийн төгсөгч “Могул Сервис энд Саппорт” ХХК -ийн Гүйцэтгэх захирал С.Болор-Эрдэнэ Электроник, холбооны инженерчлэлийн тэнхимийн компьютерийн сүлжээний хөтөлбөрийн багш, профессоруудад хүлээлгэн өглөө. Энэхүү үйл ажиллагаанд МУИС-ийн ЭХИТ -ийн багш С.Жамъян, ЭХИТ -ийн эрхлэгч Д.Баттулга, ХШУИС-ийн захирал Д.Бямбажав, компьютерийн сүлжээ хөтөлбөрийн профессор, багш нар байлцан төхөөрөмжийн ажиллагаатай биечлэн танилцаж МУИС-ийн МТГ-ийн серверийн өрөөнд байршууллаа.
Ирээдүйн чадварлаг инженер болохоор зорин компьютерийн сүлжээ хөтөлбөрөөр суралцаж буй оюутан залуусыг дэмжин, тэдний сургалтын орчинг сайжруулахад үнэтэй хувь нэмэр оруулсан “Могул Сервис энд Саппорт” ХХК -ийн хамт олондоо МУИС, ХШУИС-ийн захиргаа, ЭХИТ-ийн хамт олноос талархлаа илэрхийлье.
