МУИС судалгааны их сургууль болох зорилгын хүрээнд эрдэмтэн багш нарын хэрэгжүүлж буй төсөл, судалгааны ажилд ёс зүйн зөвшөөрөл өгөх үйл ажиллагаа явагдаж байна.
“Institutional Review Board” буюу Судалгааны Ёс Зүйг Магадлах Зөвлөл үйл ажиллагаа явуулаад багагүй хугацаа өнгөрсөн бөгөөд энэ хугацаанд хэд хэдэн олон улсын болон дотоодын төсөл, магистрын ажлуудыг хэлэлцэн зөвшөөрөл олгож байна.
Тус зөвлөл үйл ажиллагаагаа өргөжүүлж, зөвлөлөө чадавхжуулах ажлын хүрээнд Канадын Бритиш Колумбын Их сургуулийн профессор Жулиан Дэркэс болон АНУ-ын Өмнөд Иллианоисын их сургуулийн профессор Д.Ундрахбуянтай уулзалт зохион байгуулав. Энэ хүрээнд 2023 оны есдүгээр сарын 13-ны өдөр Канадын Бритиш Колумбын Ёс зүйн зөвлөлд ажиллаж буй докторант П.Болормаатай цахим хэлэлцүүлгийг зохион байгууллаа. Уулзалтаар өргөдөл хүлээн авах болон шийдвэр гаргах үйл явцыг цахимжуулах, гишүүд болон ахисан түвшний сургалтад судалгааны ёс зүйн зөвшөөрөл авахад шаардлагатай сургалтыг зохион байгуулах зэрэг санал, санаачлагыг боловсруулав.
Судалгааны үйл явцын чухал хэсэг бол судалгааны ёс зүйн хэм хэмжээг баримтлан ажиллах юм. Судалгааны ёс зүйг магадлах зөвлөл зөвшөөрөл авах хүсэлтэй хэн бүхэнд нээлттэй тул доорх мэдээллийн дагуу хандана уу.
Та бүхэн судалгааны ёс зүйн зөвшөөрөл авах бол irb@num.edu.mn болон https://sas.num.edu.mn/irb/ хаягаар хүсэлтээ илгээх боломжтой.
Зөвшөөрөл олгоход бүрдүүлэх баримт, бичгийг сар бүрийн нэгдүгээр долоо хоногийн Баасан гарагийн 17:00 цагт хүртэл ирүүлсэн хүсэлтээр тасалбар болгоно.
Ёс зүйн зөвшөөрөл хүсэлт илгээхэд бүрдүүлэх баримт бичиг:
- Судлаачийн овог нэр, хэлэлцүүлэх ажлын нэр, ямар нэгж, байгууллагаас мэдүүлэг гаргаж байгааг тусгасан судалгаа хийх ёс зүйн зөвшөөрөл хүссэн өргөдөл
- Хэлэлцүүлэх ажлыг 150 үгэнд багтаан товчилсон танилцуулга
- Тус ажлын арга, аргачлалын талаар дүгнэсэн харьяа тэнхимийн эрхлэгч болон мэргэжлийн шинжээчийн тодорхойлолт
- Хэрэв хүнийг хамруулсан судалгаа бол таниулсан зөвшөөрлийн хуудас болон Хавсралт 2-н асуултад хариулсан байх
- Хэрэв амьтныг хамруулсан судалгаа бол Хавсралт 3-н асуултад хариулсан байх
- Гаднын байгууллагатай хамтарсан эсвэл санхүүжилт авч байгаа бол тухайн байгууллагын ёс зүйн хяналтын зөвлөлийн зөвшөөрлийн хуулбарыг албан ёсны орчуулгын хамт илгээх
- Тухайн төсөл, эрдэм шинжилгээ, судалгааг хийх байгууллагын зөвшөөрөл бүхий албан бичиг
- Төлбөрийн баримт (материал хүлээн авсны дараа мэйлээр холбогдон төлбөрийн зааварчилгааг өгнө)
