Төрийн өмчийн зургаан их сургуулийн номын сангийн хамтын ажиллагааны санамж бичгийн хүрээнд “Номын сан– Өнөөдөр, маргааш II” хэлэлцүүлгийг амжилттай зохион байгууллаа.
Хэлэлцүүлгийн зорилго нь Төрийн өмчийн зургаан их сургуулийн номын сангийн хамтын ажиллагааг идэвхжүүлэх, тулгамдаж буй асуудал, цаашид авч хэрэгжүүлэх арга хэмжээний талаар санал солилцох, зөвлөмж боловсруулахад оршино. МУИС-ийн номын сангаас жил бүрийн есдүгээр сард тэмдэглэдэг “Соёл, урлагийн ажилтны өдөр”-ийг тохиолдуулан энэхүү хэлэлцүүлгийг зохион байгуулдаг уламжлалтай билээ. Ийнхүү номын сангийн салбарт тулгамдаж буй асуудал, шийдлийн талаар санал солилцлоо.
Хэлэлцүүлэгт Төрийн өмчийн зургаан их сургуулийн номын сангийн төлөөлөл оролцож, нийт долоон илтгэл хэлэлцүүлэв. Тухайлбал, номын сангийн сан хөмрөгийн цахимжуулалт, зохиогчийн эрхийн асуудал, бүтээлийн хуулбарлалт, эрдэм шинжилгээ-лавлагааны сан, 24 цагийн үйлчилгээ зэрэг сэдвүүдийг хэлэлцлээ.
Эргэн сануулахад, Дээд боловсролын хөгжлийн чиг хандлагад нийцүүлэн чанар хүртээмжийг дээшлүүлэх, бүх талын нөөц, туршлагаа харилцан хуваалцах, улмаар судалгаанд суурилсан их сургуулийг хөгжүүлэх зорилгоор 2021 оны хоёрдугаар сарын 6-ны өдөр Төрийн өмчийн их сургуулиудын хамтын ажиллагааны санамж бичгийг байгуулсан. Энэхүү санамж бичгийн хүрээнд Төрийн өмчийн зургаан их сургууль номын сангаа хамтран ашиглах журам боловсруулан номын сангууд мөрдөн ажиллаж байна.
Дээд боловсролын байгууллагын номын сангийн сан хөмрөгийн 70 хувийг хамтын ажиллагаатай зургаан их сургуулийн номын сан эзэлдэг. Эдгээр сургуулийн номын сангуудын хамтын ажиллагаа нь цаашлаад дээд боловсролын дэргэдэх сургалт, эрдэм шинжилгээний номын сангийн хөгжилд ихээхэн хувь нэмэр оруулах чухал ач холбогдолтой юм.
