Мицубиши Корпораци нийгмийн хариуцлагын хүрээнд 10 дахь жилдээ МУИС-ийн суралцагчдад олон улсын тэтгэлгийг олгож буй. Тус тэтгэлэг нь идэвхтэй, сурлага сайтай, манлайлагч, сургалтын төлбөрийн дэмжлэг шаардлагатай суралцагчдыг дэмжин, хөгжүүлэх зорилготой. 2023-2024 оны хичээлийн жилд Мицубиши Корпорацийн олон улсын тэтгэлэгт нийт 52 суралцагч материал ирүүлснээс эцсийн шатанд шалгарсан бакалаврын түвшний дөрвөн суралцагчид тэтгэлэг олголоо.
Мицубиши Корпораци нь Японд төвтэй, дэлхийн 90 орчим улсад 200 гаруй салбар нэгж, 600 гаруй охин болон хараат компанитай бөгөөд Байгаль орчин, дэд бүтцийн бизнес, Аж үйлдвэрийн санхүүгийн бизнес, Энергийн бизнес, Металл, Тоног төхөөрөмж, Хими, Ахуйн аж үйлдвэр гэсэн долоон группээр дамжуулан өргөн хүрээг хамарсан үйл ажиллагаа явуулж, гадаад худалдаагаар зогсохгүй бизнесийн хамтрагчидтайгаа хамтран дэлхийн өнцөг булан бүрд бизнес хөгжүүлэлт, үйлдвэрлэл болон бүтээн байгуулалтын ажлыг эрхлэн явуулж байна.
Ёслолын арга хэмжээнд тэтгэлэг олгогч талаас Мицубиши корпорацийн Улаанбаатар дахь төлөөлөгчийн газрын дарга Таката Мотосабүро, тус газрын мэргэжилтэн Э.Сэнжидмаа, МУИС-ийн талаас Оюутны хөгжил эрхэлсэн захирал Г.Галбаяр, Оюутны хөгжил, бодлогын газрын дарга В.Дашдаваа, төвийн эрхлэгч М.Эрдэнэчимэг, төвийн ахлах мэргэжилтэн Л.Чинзориг нар шалгарсан суралцагчдад хандан цаашдын сурлага хөдөлмөрт өндөр амжилтыг хүсэн тэтгэлгийн батламжийг гардууллаа.
Мицубиши Корпораци нь ирэх хичээлийн жилээс тэтгэлэгт хөтөлбөрөө зогсоож буйгаа илэрхийлсэн бөгөөд Оюутны хөгжил эрхэлсэн захирал Г.Галбаяр хамтран ажиллагч Мицубиши Корпорацийн хамт олонд талархал илэрхийлж эргэн уулзахын ерөөл дэвшүүлэн дурсгалын зүйл гардуулан өглөө.
2023-2024 оны хичээлийн жилд тэтгэлэгт шалгарсан суралцагчид
|
№ |
Овог |
Нэр |
Сургууль |
Хөтөлбөр |
||
|
1 |
Гагаа |
Алтанхишиг |
ОУХНУС |
Олон улсын харилцаа |
||
|
2 |
Төгсбаяр |
Баясгалан |
ШУС БУС |
Биотехнологи |
||
|
3 |
Мөнхбаатар |
Мөнх-Учрал |
ШУС НУС |
Археологи |
||
|
4 |
Ганбаатар |
Энхжин |
ШУС НУС |
Нийгмийн ажил |
Тэтгэлэгт шалгарсан суралцагчдын төлөөллөөс ШУС-ийн НУС-ын Нийгмийн ажил хөтөлбөрийн Г.Энхжин талархлын мэндчилгээ хүргэв. Тэрбээр, “Би болон гэр бүлийнхэнд маань сургалтын төлбөр гэх ачаанаас бага ч гэсэн хөнгөвчлөх боломжийг олгосон, оюутнуудыг суралцах нөхцөлөөр дэмжсэн Мицибуши корпарацийн хамт олонд чин сэтгэлээсээ талархсанаа илэрхийлж байна” гэлээ.
Мөн 2022-2023 оны хичээлийн жилд тэтгэлэгт хамрагдсан Э.Буянбаатар, Ц.Дэлгэрмөрөн, Б.Цогзоллхам, Э.Бямбасүрэн нараас Мицубиши корпорацийн хамт олонд видео мэндчилгээ дэвшүүлж, талархал илэрхийллээ.
ОЮУТНЫ ХӨГЖЛИЙН ТӨВ
