“Эрасмус+” төслийн хүрээнд Хорват Улсын Дубровникийн Их Сургуулийн бакалавр/магистрын оюутан солилцооны хөтөлбөрт урьж байна

2024-09-17

Европын Холбооны санхүүжилттэй “Эрасмус+” хөтөлбөрийн хүрээнд хэрэгжиж буй Хорват Улсын Дубровникийн Их Сургууль (University of Dubrovnik, Croatia)-ийн бакалавр/магистрын оюутан солилцооны хөтөлбөрийн сонгон шалгаруулалтад урьж байна.

Уг хөтөлбөрт хүсэлт гаргагч нь МУИС-ийн дор дурдсан мэргэжил, түвшинд суралцагч байх шаардлагатай бөгөөд зөвхөн МУИС-ийн Хамтын ажиллагааны хэлтсээр (Erasmus Code: Ulaanbaatar PIC 925609309) дамжуулан хөтөлбөрт хамрагдах хүсэлт гаргана.

Мэргэжлийн чиглэл, түвшин:

Эдийн засаг, худалдаа, бизнесийн эдийн засгийн чиглэлийн магистрын түвшний оюутан (1 хүн)
Сэтгүүл зүй, олон нийттэй харилцах чиглэлийн бакалаврын түвшний оюутан (1 хүн)
Экологийн чиглэлийн бакалаврын түвшний оюутан (1 хүн)

Хөтөлбөрийн хугацаа:

2024-2025 оны хичээлийн жилийн өвлийн семестр

Тэтгэлгийн хэмжээ:

Сургалтын төлбөр, нислэгийн тийзийн төлбөр болон амьжиргааны зардлыг хариуцна.

Тавигдах шаардлага:

Дээр заасан мэргэжлийн хөтөлбөрүүдийн аль нэгд идэвхтэй суралцаж буй МУИС-ийн бакалаврын II эсвэл III курсийн, магистрын түвшний I болон түүнээс дээш улирал суралцсан оюутан байх
Англи хэлний B2-C1 түвшний мэдлэгтэй байх
Доорх ангиллуудаас аль нэгэнд нь хамаарагдах нэр дэвшигчдийн онцгой нөхцөл байдлыг харгалзан үзнэ. Үүнд:

Санхүүгийн чадамж хязгаарлагдмал, эмзэг бүлгийн нэр дэвшигч.

Хавсаргах баримт бичиг: Төрөөс халамж, нэмэлт санхүүгийн тусламж авдаг гэдгийг нотлох баримт бичиг

Хөгжлийн бэрхшээлтэй нэр дэвшигч.

Хавсаргах баримт бичиг: Эмчийн бичиг (эх хувиараа, материал бүрдүүлж өгсөн өдрөөс ихдээ зургаан сарын дотор бичигдсэн байх)

Бүрдүүлэх материал:

Суралцагчийн товч анкет (CV)
Суралцах захидал буюу Cover letter or Motivation letter
Оюутны тодорхойлолт (Англи хэл дээр)
Дүнгийн албан ёсны тодорхойлолт (Англи хэл дээр)
Хэлний мэдлэгийг тодорхойлох батламж
Нэмэлт амжилт тодорхойлох баримт бичгүүд

Хүсэлт хүлээн авах хугацаа: 2024 оны есдүгээр сарын 27 (Баасан гараг) хүртэл

Товлогдсон хугацаанд багтаан холбогдох материалын хуулбарыг PDF нэг файл болгон Хамтын ажиллагааны хэлтсийн int_rel@num.edu.mn цахим хаягаар явуулна. Subject хэсэгт (STUDEXCH, DUBROVNIK, /NAME/) гэж бичнэ. Хугацаа хоцорсон материал хүлээн авахгүй.