Монгол Улсын Төрийн соёрхолт, Академич, шинжлэх ухааны доктор, профессор математикч Рэнцэнгийн Энхбатад “МУИС-ийн Эмерит профессор” цол олгох хүндэтгэлийн үйл ажиллагаа 2024 оны аравдугаар сарын 30-ны өдөр МУИС-ийн Эрдмийн танхимд боллоо.
МУИС-ийн Эрдмийн зөвлөлөөс Монголын математикийн боловсрол, шинжлэх ухаанд оруулсан жинтэй хувь нэмэр, бүтээл туурвилыг өндрөөр үнэлэн профессор Р.Энхбатад “МУИС-ийн Эмерит профессор” цол олгохоор шийдвэрлэсэн билээ.
Ёслолын үйл ажиллагаанд МУИС-ийн удирдлага, Эрдмийн зөвлөлийн гишүүд, Монголын математикчид, гэр бүл, найз нөхөд, оюутан залуусын төлөөлөл оролцож, “МУИС-ийн Эмерит профессор” Р.Энхбат хүндэтгэлийн лекц уншив.
Р.Энхбат нь хучилтын бодлогын ерөнхий онол, аргыг боловсруулан Италийн математикч Мальфаттийн 1803 онд дэвшүүлсэн 200 гаруй жилийн турш бүрэн шийдэгдээгүй байсан бодлогыг өөрийн дэвшүүлсэн глобаль оптимизацийн онол, алгоритмаар нэг мөр шийдсэн, тоглоомын онолд Anti-Berge, Anti-Nash гэсэн тэнцвэрийн шинэ ойлголтуудыг оруулж ирэн олон улсад хүлээн зөвшөөрүүлсэн, мөн “квази-гүдгэр программчлал” гэсэн судалгааны шинэ чиглэлийг оновчлолын онолд бий болгон хөгжүүлсэн, эдгээр ажлын үр дүнгээ Дэлхийн математикчдын их хуралд хэлэлцүүлэн баталсан нэрт математикч юм. Тэрээр өөрийн бий болгосон оновчлолын онолын шавь сургалтаар 12 доктор (PhD)-ын ажил удирдан хамгаалуулжээ.
Түүний туурвисан бүтээлүүдийн эшлэлийн тоо- 741, h-index- 13, i10-index- 22-оор хэмжигдэж байна.
МУИС-ийн Эрдмийн зөвлөл,
Хамтын ажиллагааны газар
