Дотоод хэргийн их сургуулийн хэрэгжүүлж буй дээд боловсролтой иргэдэд зориулсан мэргэшүүлэх 2 жилийн сургалтын хөтөлбөрийг танилцуулах өдөрлөг Монгол Улсын Их сургуульд боллоо. Өдөрлөгт Хууль зүй, дотоод хэргийн сайд О.Алтангэрэл, МУИС-ийн ректор, профессор Б.Очирхуяг, ДХИС-ийн ректор, бригадын генерал П.Батбаатар болон тус сургуулийн Захирлын зөвлөлийн гишүүд, багш, албан хаагчид, МУИС-ийн төгсөх түвшний суралцагчид оролцов.
Мэргэшүүлэх 2 жилийн хөтөлбөр нь бусад мэргэжлээр их, дээд сургууль төгссөн залуусыг богино хугацааны сургалтад хамруулж, цагдаагийн байгууллагад ажиллах мэдлэг, ур чадвар олгох зорилготой бөгөөд төгсөгчид 100 хувь ажлын байраар хангагдах боломжтой байдаг байна.
Мэргэшүүлэх хөтөлбөрт хамрагдах сонирхолтой иргэдэд эрүүл мэнд болон боловсролын шалгуур тавих бөгөөд тус хөтөлбөрт хамрагдсанаар:
- Мэргэжлийн тусгай мэдлэг бүхий мэргэжил эзэмших
- Сонсогчоор суралцсан хугацааг төрийн албанд ажилласанд тооцох
- Сургалтын болон дүрэмт хувцсаар хангах
- Сурч байх хугацаанд цолны цалин, нийгмийн даатгал төлөгдөх
- Цэргийн алба хаасанд тооцох гэх мэт давуу талтай.
Хууль зүй, дотоод хэргийн сайд О.Алтангэрэл МУИС-ийн Эрдмийн хамт олонд 1945 оны 10 дугаар сарын 20-ны өдөр Монгол Улсын тусгаар тогтнолын төлөө бүх ард түмний санал хураалтыг явуулж, Монголын ард түмэн 100 хувийн саналаар тусгаар тогтносон улс болохыг дэмжсэн тухай зурагт хуудсыг гардуулсан юм.
