АНУ-ын Миссуригийн их сургуультай хамтын ажиллагаагаа өргөжүүлнэ

2025-04-04

АНУ-ын Миссуригийн Их Сургуулийн Ази судлалын төв, Олон улсын сургалтын хүрээлэнгийн захирал ноён Ким Сан МУИС-д айлчилж, Сургалт, оюутны хөгжил эрхэлсэн проректор, профессор Д.Заяабаатар түүнийг хүлээн авч, хоёр их сургуулийн хамтын ажиллагааны талаар санал солилцлоо.

Уулзалтын үеэр Миссуригийн Их Сургуулийн төлөөлөгчид МУИС-тай хамтын ажиллагааны санамж бичиг байгуулах сонирхолтой буйгаа илэрхийлж, хоёр их сургуулийн оюутан, багш, судлаачдад зориулсан тусгай соёл, боловсролын хөтөлбөрүүдийг танилцууллаа.

Тухайлбал, тус сургуулийн Ази судлалын төвөөс хэрэгжүүлдэг LEAD (Lead, Engage, Advance, Discover) хөтөлбөр нь бакалаврын түвшний оюутнуудад зориулсан, нэг семестр үргэлжлэх боловсролын хөтөлбөр бөгөөд өнгөрсөн 15 жилийн хугацаанд Өмнөд Солонгос, Япон, Хятад, Тайвань, Монгол зэрэг орны оюутнууд уг хөтөлбөрт хамрагджээ.

Мөн гадаадын их, дээд сургуулийн багш, судлаач, мэргэжилтнүүд болон төрийн албан хаагчдад зориулсан Global Leadership Program (GLP)-ийн талаар мэдээлэл өглөө. Энэхүү хөтөлбөр нь хэл, соёлын солилцоог хөгжүүлэх зорилготой бөгөөд сүүлийн 25 жилийн хугацаанд Ази тивээс 2,000 гаруй мэргэжилтэн хамрагдсан байна. Одоогийн байдлаар тус хөтөлбөрт Өмнөд Солонгосоос 58, Хятадаас 8, Монгол Улсаас 1 судлаач оролцоод байна.

МУИС-ийн проректор, профессор Д.Заяабаатар Миссуригийн Их Сургуулийн эдгээр хөтөлбөрүүдэд хамтран ажиллах сонирхолтой буйгаа илэрхийлж, насан туршийн боловсрол, зэргийн бус сургалтын чиглэлээр туршлага судлах хүсэлтэй байгаагаа онцлов. Хоёр их сургууль цаашид хамтын ажиллагааны санамж бичиг байгуулж, харилцан оюутан, судлаач солилцоог өргөжүүлэхээр санал нэгдлээ.

Уулзалтад Миссуригийн Их Сургуулийн талаас Ази судлалын төв, Олон улсын сургалтын хүрээлэнгийн захирал ноён Ким Сан, Ази судлалын төвийн хөтөлбөрийн чиглүүлэгч Д.Саямаа, МУИС-ийн талаас Сургалт, оюутны хөгжил эрхэлсэн проректор профессор Д.Заяабаатар, Хууль зүйн сургуулийн захирал профессор Б.Амарсанаа, тус сургуулийн дэд профессор С.Болормаа, Хамтын ажиллагааны газрын дарга Ш.Мэндбаяр нар оролцов.