МУИС-ийн ШУС-ийн Орчуулагч, хэлмэрчийн мэргэшлийн үнэлгээний төвөөс Орчуулагч, хэлмэрчийн зэрэг тогтоох /MAЕTI/ “Хэлмэрчийн анхан шатны цогц чадварын туршилт шалгалт”-ыг 2025 оны 6 дугаар сарын 14-ний өдөр зохион байгууллаа.
Шалгалтад англи хэлний 1, хятад хэлний 6 хэлмэрч сайн дураар бүртгүүлснээр тэдний эх хэл ба гадаад хэлний мэдлэг, гадаад хэл-эх хэл, эх хэл-гадаад хэлний хэлмэрчлэхүйн ур чадварыг сорих сорилгоор цогц чадварыг шалгажээ.
Хэлмэрчийн ур чадвар анхан шатны түвшинд хүрсэн нь шалгалтаар тогтоогдвол гуравдугаар зэргийг батламжилсан гэрчилгээ олгодог бөгөөд энэ удаагийн шалгалтад 4 шалгуулагч тэнцсэн тул 2025 оны 7-р сарын 8-ны өдөр гэрчилгээгээ гардан авлаа.
Гэрчилгээ гардуулах ёслолд МУИС-ийн ШУС-ийн ХУС-ын захирал, доктор, профессор Г. Элдэв-Очир, МУИС-ийн ШУС-ийн Орчуулагч, хэлмэрчийн мэргэшлийн үнэлгээний төвийн эрхлэгч, доктор, дэд профессор Ш. Эгшиг, дэд профессор Э.Мөнх-Учрал, дэд профессор М.Даариймаа, дэд профессор Л.Соёл, хятад судлаач, манай улсын хятад хэлний нэртэй орчуулагч, хэлмэрч, доктор Х.Баатархүү нарын зэрэг шалгалтын комиссын шалгагч багш нар болон шалгуулагчид оролцов.
Уг шалгалт нь орчуулгын зах зээлд шаардагдаж буй ур чадвар бүхий мэргэжилтнүүдийг тодорхойлох, үнэлэх, тэдний ур чадварт харгалзах чадамжийн зэргийн гэрчилгээ олгох зорилготой.
Англи, орос, хятад, япон, герман, солонгос, франц, турк, итали, испани, чех, польш, араб хэлний орчуулагч болон хэлмэрчийн мэргэшлийн анхан шатны зэрэг тогтоох албан ёсны шалгалтыг энэ оны 9-р сард зохион байгуулах аж.
