Монгол Улсын Их Сургуулийн Боловсрол, сэтгэл судлалын тэнхим байгуулагдсаны 60 жилийн ойн ажлын хүрээнд “Багш бэлтгэдэг их, дээд сургуулийн сургалтын агуулга, арга зүйн болон сэтгэл зүйн асуудлууд” сэдэвт эрдэм шинжилгээний хурал 2014 оны 12 сарын 12-ны өдөр болно. Тус тэнхим нь 1940 онд гаргасан тушаалын дагуу 1954 онд үйл ажиллагаагаа эхлүүлж байсан түүхтэй.
Эрдэм шинжилгээний хурлын сэдвийн хүрээнд багш бэлтгэдэг их, дээд сургуулийн сургалтын технологийн шинэчлэл, их, дээд сургуулийн багшийн сурган хүмүүжүүлэх үйл ажиллагаа ба ур чадвар, кредит тогтолцоо ба сургалтын бодлого, зохион байгуулалт, шинжлэх ухаан, техник, технологийн нарийн мэргэжлээр багшлах боловсон хүчин бэлтгэх асуудал, үйлдвэрлэлийн дадлагын чанар, хүртээмж, үр дүн, багшийн мэргэжлээр суралцаж буй оюутны эрдэм шинжилгээ, судалгааны ажлын үр дүн, багшлах боловсон хүчний болон оюутны сэтгэл зүйн бэлтгэл, оюутан бие хүний хөгжлийн асуудал, оюутны нийгэмшил ба мэргэжилтэн бие хүний төлөвшил зэрэг асуудлаар онолын болон эмпирик судалгааны үр дүнг хэлэлцүүлнэ.
Хуралд илтгэл тавьж оролцох багш бэлтгэдэг их, дээд сургуулийн багш, эрдэм шинжилгээний хүрээлэнгийн ажилтнууд 2014 оны 11 дүгээр сарын 14-ний дотор илтгэлээ narantuya_mend@yahoo.com. цахим хаягаар ирүүлнэ үү. Илтгэл, өгүүллийг тэнхимээс эрхлэн гаргадаг “Боловсрол судлал” сэтгүүлд хэвлэх ба эрдэм шинжилгээний илтгэл, өгүүлэлд тавигддаг үндсэн шаардлагыг хангасан байвал зохино.
Сонирхож буй багш, судлаачид narantuya_mend@yahoo.com хаягаар мэдээлэл авна уу.
МУИС, ШУС-ийн нийгмийн ухааны салбарын
Боловсрол, сэтгэл судлалын тэнхим
