Шинэ оны босгон дээр МУ-ын Ерөнхийлөгчийн зарлигаар салбар салбартаа ажил үйлсээрээ манлайлсан эрхмүүдийг төрийн одон медалиар энгэрийг нь цоолдог уламжлалтай. Боловсролын салбарт оруулсан хувь нэмрийг нь өндрөөр үнэлж МУИС-ийн 7 багшийг 2014 оны 12 дугаар сарын 25-ны өдөр “Алтан гадас”, “Хөдөлмөрийн гавьяаны улаан туг”-ийн одонгоор шагналаа.
Хэрэглээний шинжлэх ухаан, инженерчлэлийн сургуулийн ахлах багш Ш.Батзориг, Хэрэглээний математикийн тэнхмийн багш, зөвлөх профессор Д.Даваадорж, дэд профессор Д.Жигжидсүрэн, Гадаад хэлний сургалтын төвийн ахлах багш (тэтгэвэртээ гарсан) Ч.Пам-Орлом, Хууль зүйн сургуулийн багш, профессор Д.Баярсайхан нар “Алтан гадас” одонгоор, ШУС-ийн Түүхийн тэнхмийн багш, дэд профессор Д.Сүхбаатар, Философи, шашин судлалын тэнхмийн багш, зөвлөх профессор Т.Дорждагва нар “Хөдөлмөрийн гавьяаны улаан туг”-ийн одонгоор тус тус шагнагдлаа. Айлчлан ирж буй шинэ онд та бүхний маань эрдмийн үйлс улам дэлгэрэхийн ерөөлийг дэвшүүлье.
