МУИС-ийн бүрэлдэхүүн, салбар сургуулиудаас шалгарсан авьяастнууд “Шилдгийн шилдэг”-ээ тодруулдаг, жилд ганц тохиох “Оюутны Урлагийн Их Наадам” өчигдөр цугласан олны уухайн дуунд, үүгээр хөглөгдөж, улам жавхаажин олон сайхан тоглолтуудыг үзүүлсэн авьяастнуудтай нижгэр болж өндөрлөлөө.
Оюутнууд урлагийн 7 төрөлд өрсөлдсөнөөс дараах байруудыг эзэлсэн байна.
Нийлбэр дүнгээр
ТЭРГҮҮН БАЙРТ 99,4 оноогоор Бизнесийн сургууль
ДЭД БАЙРТ 96,9 оноогоор ШУС-ийн Нийгмийн ухааны салбар
ГУТГААР БАЙРТ 88,7 оноогоор Хэрэглээний шинжлэх ухаан, инженерчлэлийн сургуулийн баг хамт олон шалгарч, удаан хугацааны туршид базаасан бэлтгэл, урсгасан хөлс, хөдөлмөрийнхөө үр дүнг ийнхүү үзлээ.
Наадмын сониноос дуулгахад МУИС-ийн захирал Р.Бат-Эрдэнэ, Сургалт хариуцсан дэд захирал О.Мөнхбат нар хүрэлцэн ирж, сургуулийнхаа урлагийн өнгө төрхийг тодорхойлон авч яваа эдгээр оюутнуудынхаа нэгдсэн тоглолтыг МУИС-ийн хүрээнээс хальж, олон түмэнд хүргэх санаачилгыг энэ үеэр дэвшүүлж, хэрэгжүүлнэ гэдгээ нийт оюутнууддаа амласан юм.
Уралдааныг Хөгжим бүжгийн коллежийн бүжгийн багш МУГЖ Ц.Алтангэрэл, Grand хамтлагийн дуучин В.Гантулга болон загвар өмсөгч, жүжигчин Б.Гэрэлчулуун нар шүүн явууллаа. Тэд хөгжмийн төрөлд хөг, тохиргоогоо тааруулахаас эхлээд маш их цаг алдсан, дугаралт тааруу зэрэг техник, зохион байгуулалтын хувьд хэд хэдэн шүүмж хэлсэн ч сэтгэл өндөр байгаагаа илэрхийлсэн.
Шүүгчдийн дүн гарах зуур үзэгчдээс сонгосон 6 оюутанд, гэр бүлийн хүчирхийллийг үггүйгээр хэрхэн илэрхийлэх вэ гэсэн бодлогын шинжтэй өгөгдлийг хос хосоороо биелүүлэх, хөгжилтэй даалгавар өгсөөн. Ингэхдээ хосууд эсрэг хүйстнийхээ дүрд тоглох шаардлагатай. МУИС-ийн Оюутны Холбооны дэд тэргүүн Н.Болд-Эрдэнэ энэ үеэр жүжиглэх авьяасаа үзүүлээд амжсан. Хэрхэн биелүүлснийг зургаас үзээрэй.
Бас нэгэн сонинг хуваалцахад МУИС-ийн Орхон сургуулийнхан Улаанбаатар хотыг зорин ирж, Гоцлол дууны төрөлд III байр эзэлсэн амжилттай ч, наадмын хүчтэй өрсөлдөгчид болохыг тэдний тоглолт, чанартай гүйцэтгэлүүдээс харж болно.
Жил бүрийн энэ үед их сургуулийнхны дунд сэдэв болдог уг наадмын өрсөлдөөн улам ширүүсч, МУИС-ийн оюутнууд зөвхөн хичээл сурлагаараа бус, тал бүрийн авьяас билэг нь хөгжсөн, манлайлагч залуу үе болохоо баталдаг аа.
Та нартаа сурлага, урлагийн амжилт хүсье. Оролцогч оюутан бүр энэ өдрийн Ялагч юм шүү. Өнөөдөр МУ-ын Үндэсний тэргүүлэх их сургуульд суралцаж байгаа 18000 оюутнаас тодорч, үлгэрлэж байгаа учраас.
