Мод тарих үндэсний өдөр буюу 5 дугаар сарын 9-нд япон судлалын салбарын багш, төгсөгчид, оюутнууд Өвөр Зайсан дахь МУИС-ийн сургалт, судалгаа, үйлчилгээний төвд мод тарьж, төгөл байгууллаа. Уг ажлыг Монгол улсад япон хэлтэй боловсон хүчин бэлтгэж эхэлсний 40 жилийн ойн арга хэмжээний хүрээнд зохион байгуулсан бөгөөд нийт 50 гаруй хүн оролцов. Энэ жил тохиож буй япон судлалын салбарын 40 жилийн ойг улсын хэмжээнд тэмдэглэж, олон бүтээлч ажил өрнүүлж байгаагийн нэг нь төгөл байгуулах ажил болж байна. Салбарын төгсөгчид төгөлөө “Сакура” хэмээн нэрлэсэн нь бэлгэдлийн утгатай ажээ. Сакура цэцэг нь Япон орны төдийгүй япон хэлний сургалтын бэлгэ тэмдэг болдог тул хожмын нэг өдөр төгөлдөө Японы сакура цэцгийн модыг тарина хэмээн бэлгэдэж төгөлөө ийнхүү нэрлэжээ. 
