МУИС-тай хамтын ажиллагааны гэрээтэй Австралийн Гриффитийн их сургуулийн дэд профессор Кристофер Клопер “Суралцахын тулд заах, заахын тулд суралцах нь: 21-р зууны дээд боловсролын сургалтын чанарыг сайжруулах” сэдвээр хийсэн судалгааны ажлын үндсэн агуулга, сонирхолтой үр дүнг танилцуулж, монголын дээд боловролын хөгжилд хэрэгжүүлж болох шинэ сэдлийг өгсөн ач холбогдолтой лекц тавилаа. 
Гриффитийн их сургуулийн Эрх зүй, боловсролын группэд олон улсын боловсрол, соёл судлалын асуудал эрхэлсэн захирал бөгөөд тус сургуулийн Гоулд Коуст кампус дахь боловсрол, мэргэшсэн сургалтын сургуульд багшилдаг тэрбээр К.Клопер нь улсдаа төдийгүй, гадаадын орнуудад ажиллаж байсан туршлагатай ажээ. Мөн Хойд Африкийн Боловсролын департментын хүүхдийн боловсрол болон дээд боловсролын сургалтын хөтөлбөрийг боловсруулах, сайжруулах үйл ажиллагаанд оролцож байсан хүн юм. 
Маш товчхон дурдвал, багшийг үнэлэх, ялангуяа багшийн сургалтын арга барил, мэдлэг чадварт оюутны зүгээс, хамт олны зүгээс тогтмол үнэлгээ өгснөөр тухайн багш хөгжих, бүх мэдээлэл ил тод, зөв шударга үнэлдэг байх тогтолцоо бий болгох нь дээд боловролын хөгжилд чухал нөлөөтэй юм гэсэн санааг профессорын судалгааны ажил баталдаг аж.
Мөн хоёр сургуулийн хамтын ажил оюутан солилцооны хөтөлбөрийг хэрэгжүүлэх боломжит нөхцөл байдлыг судлахаас эхлэхээр тохиролцсон байна. Хамтын ажиллагааны нэгээхэн хэсэг болгож профессорын судалгааны ажлыг их сургуульдаа хэрэгжүүлэхэд чиглэсэн бодлогыг явуулж болох юм.
