“Боловсролын тухай” хууль, “Дээд боловсролын тухай” хуулиудад нэмэлт өөрчлөлт оруулсантай холбогдуулан Монгол Улсын Боловсрол, соёл, шинжлэх ухаан, спортын сайдаас МУИС-ийн Удирдах зөвлөлийн бүрэлдэхүүнийг шинэчлэн, үүнд багш нарын 3 төлөөлөл, төгсөгчдийн 2, Монголын оюутны холбооны 1, нийт 6 хүн байхаар тогтоож, эдгээр төлөөллийг хэрэгжүүлэх гишүүдийг сонгож, нэрсийг анкет материалын хамт 2016 оны 12 дугаар сарын 21-ний дотор яаманд ирүүлэх албан даалгавар өгсөн байна.
МУИС-ийн Удирдах зөвлөл дэх багш нарын төлөөллийг сонгох ажлыг ”Монгол Улсын Их Сургуулийн Удирдах зөвлөлийн дүрэм”-ийн 2 дугаар зүйлийн 2.3-т “Багшийн төлөөлөл нь үндсэн орон тоонд ажилладаг багш байх бөгөөд нийт багш, эрдэм шинжилгээний ажилтан нарын 50-иас доошгүй хувийн ирцтэйгээр сонгоно…хэмээн заасныг баримтлан богино хугацаанд зохион байгуулах шаардлагатай боллоо.
Иймд МУИС-ийн үндсэн багш нар 2016 оны 12 дугаар сарын 19-ний өдрийн 08.00-20.00 цагийн хооронд МУИС-ийн СиСи мэдээллийн системээр өөрийн харьяалагдах бүрэлдэхүүн сургуулийн үндсэн багш нараас нэг багшийн нэрийг дэвшүүлэхийг урьж байна.
Энэ нэр дэвшүүлэлтээр хамгийн олон санал авсан Олон улсын харилцаа, нийтийн удирлагын сургуулийн 1, Хууль зүйн сургуулийн 2, Бизнесийн сургуулийн 3, Хэрэглээний шинжлэх ухаан, инженерчлэлийн сургуулийн 3, Шинжлэх ухааны сургуулийн 6 багш буюу нийт 15 багшаас Удирдах зөвлөлийн гишүүн 3 багшийг сонгох нууц санал хураалтыг 2016 оны 12 дугаар сарын 20-ны өдөр хичээлийн 1 дүгээр байрны 208 тоотод 09.00-18.00 цагийн хооронд зохион байгуулна.
Та бүхэн идэвхитэй оролцоно уу
Сургуулийн захиргаа
2016-12-16
