МУИС-ийн захирал С.Төмөр-Очир энэ сарын 01-05-ны өдрүүдэд БНЭУ-ын нийслэл Шинэ Дели хотноо зохион байгуулагдсан “Тогтвортой хөгжлийн Делигийн дээд хэмжээний чуулга уулзалт”-нд оролцлоо.
Энэхүү чуулга уулзалт нь 2001 оноос эхлэн жил бүр зохион байгуулагдаж тогтвортой хөгжлийн дэлхий нийтэд тулгарч буй асуудлуудыг тал бүрээс нь ярилцаж, шийдвэрлэх арга замыг тодорхойлдог байна. Энэ удаагийн уулзалтанд 59 орны 300 гаруй төлөөлөгч оролцсон бөгөөд чуулга уулзалтын ерөнхий зохион байгуулагч нь Энэтхэгийн ТERI их сургуулийн захирал, уур амьсгалын өөрчлөлтийн судалгааны нэрт эрдэмтэн, Нобелийн энхтайвны шагналт, МУИС-ийн хүндэт доктор Р.К.Пачори байсан юм.
Захирал С.Төмөр-Очир чуулганд илтгэл тавьж оролцохоос гадна төлөвлөгөөний дагуу уулзалтын үеэр ТERI их сургууль, МУИС-ийн хооронд хамтын ажиллагааны санамж бичигт гарын үсэг зурж, тогтвортой хөгжлийн чиглэлээр хамтарсан төсөл хэрэгжүүлэхээр боллоо.
Мөн Жавхарлал Нерүгийн их сургуулийн захирал Судхир К. Сопорутай уулзаж хоёр их сургуулийн хооронд хамтран ажиллах гэрээний анхны хувилбарыг солилцож, захирал Судхир К. Сопоруг МУИС-д айлчлахыг урьсан бөгөөд айлчлалын үеэр гэрээнд гарын үсэг зурахаар тохиров.
Үүнээс гадна уулзалтын үеэр Нобелийн шагналт профессор Элинор Остром, АНУ-ын Иелийн их сургуулийн менежментийн сургуулийн профессор Жефери А.Сонненфельд, Азийн Хөгжлийн Банкны мэдлэгийн менежмент, тогтвортой хөгжлийн асуудал хариуцсан дэд захирал Бинду Н.Лохани нартай уулзан МУИС-д хүрэлцэн ирж лекц уншихыг урихад эрдэмтэн профессорууд ч урилгыг дуртай хүлээн авсан юм.
Тогтвортой хөгжлийн Делигийн дээд хэмжээний чуулга уулзалт 2013 онд “The global Challenge for resource efficient and low carbon development ” сэдвээр болох бөгөөд МУИС-ийн захирал С.Төмөр-Очирыг мөн хүрэлцэн ирэхийг урилаа.
