ОРОСЫН ХОЛБООНЫ УЛСЫН ЗАСГИЙН ГАЗРЫН
ТЭТГЭЛГЭЭР СУРАЛЦУУЛНА
Хоёр улсын Засгийн газар хоорондын хэлэлцээрийн дагуу 2012-2013 оны хичээлийн жилд Оросын Холбооны Улсын Засгийн газрын тэтгэлгээр тус улсын их, дээд сургуульд 230 бакалавр болон магистр оюутан, 50 аспирант болон докторант, 20 мэргэжил дээшлүүлэгч суралцуулна. Мэргэжлийн чиглэлээр хуваарилбал:
– байгалийн ухааны чиглэлээр 30 бакалавр, 5 магистр, 10 аспирант, докторант,
– инженер технологийн чиглэлээр 85 бакалавр, 5 магистр, 10 аспирант, докторант,
– хөдөө аж ахуйн чиглэлээр 20 бакалавр, 5 магистр, 5 аспирант, докторант,
– анагаах ухааны чиглэлээр 10 бакалавр оюутан, 5 аспирант, докторант,
– эдийн засаг менежментийн чиглэлээр 10 бакалавр, 3 магистр, 5 докторант,
– боловсролын чиглэлээр 10 бакалавр, 3 магистр, 3 аспирант, докторант,
– биеийн тамирын чиглэлээр 5 бакалавр,
– нийгмийн ухааны бусад чиглэлээр 23 бакалавр, 10 магистрант, 15 докторант байна.
Нэг. Тэтгэлэгт хамрагдагчдад тавигдах шаардлага
1/ Бакалавр оюутан нь:
– Монголын Улсын магадлан итгэмжлэгдсэн их, дээд сургууль, коллежийн 1, 2 дугаар ангид 3,0-аас дээш голч дүнтэй суралцаж байгаа, ЕБС-ийг суралцахыг хүсэж байгаа мэргэжлийн суурь хичээлүүдэд “А”, “В” үнэлгээтэй төгссөн,
2/ Магистр, аспирант нь:
– Магистрант нь бакалаврын зэрэгтэй, бакалаврын дипломын голч дүн нь 3,0-аас доошгүй, мэргэжлийн үндсэн хичээлүүдэд 80-аас дээш хувийн үнэлгээтэй, 35 хүртэлх насны,
– Аспирант нь магистрын зэрэгтэй, магистрын дипломын голч дүн нь 3,0-аас доошгүй, мэргэжлийн үндсэн хичээлүүдэд 80-аас дээш хувийн үнэлгээтэй, 45 хүртэлх насны;
3/ Докторант, мэргэжил дээшлүүлэгч нь:
– Докторант нь доктор / Ph.D/-ын зэрэгтэй,
– Мэргэжил дээшлүүлэгч нь бакалавр/магистрын зэрэгтэй Монгол Улсын иргэн байна.
Өмнө нь ОХУ-ын Засгийн газрын тэтгэлэгт хамрагдсан бол дахин тэтгэлэг олгохгүй болно.
Хоёр. Бүртгэл
МУИС-ийн Бүрэлдэхүүн сургууль тус бүр шаардлага хангасан 4-5 оюутны бүртгэлийг 3 сарын 14-ний дотор Оюутанд үйлчлэх төвд ирүүлнэ үү.
Гурав. Сонгон шалгаруулалт
Бакалавр болон магистрын сонгон шалгаруулалт нь мэргэжлийн шалгалт ба орос хэлний шалгалт гэсэн хоёр үе шаттай байна. Суралцах мэргэжлийн чиглэлээс хамаарч мэргэжлийн шалгалтыг “математик”, “хими”, “нийгмийн тухай мэдлэг” гэсэн хичээлүүдийн аль нэгээр өгнө.
Шалгалтыг МУИС-ийн хичээлийн 2 дугаар байрны өргөтгөлийн 2, 3 дугаар давхарын уншлагын танхимуудад зохион байгуулна. Шаардлага гарвал шалгалт авах нэмэлт байр гаргаж, шалгалтын үеэр жич зарлана. Иргэний үнэмлэхгүй хүнийг шалгалтад оруулахгүй.
Математикийн шалгалтыг 2012 оны 3 дугаар сарын 20-ны өдрийн 15.00 цагт авч, дүнг дараа өдрийн 18.00 цагт МУИС-ийн хичээлийн 2 дугаар байрны зарлалын самбарт байрлуулна. Хими, нийгмийн тухай мэдлэгийн шалгалтыг 2012 оны 3 дугаар сарын 22-ны өдрийн 15.00 цагт авч, дүнг дараа өдрийн 18.00 цагт МУИС-ийн хичээлийн 2 дугаар байрны зарлалын самбарт байрлуулна. Мэргэжлийн шалгалтад 60 ба түүнээс дээш оноо авсан хүмүүс орос хэлний шалгалт өгнө. Орос хэлний шалгалтыг 2012 оны 3 дугаар сарын 24-ны өдрийн 10.00 цагт авч, дүнг дараа өдрийн 18.00 цагт МУИС-ийн хичээлийн 2 дугаар байрны зарлалын самбарт байрлуулна.
Бакалавр оюутан болон магистрантыг хоёр шалгалтын нийлбэр дүнгээр онооны дарааллаар жагсааж, тухайн мэргэжлийн чиглэлээр зарлагдсан квотод багтаан шалгаруулна.
Сонгон шалгаруулалтанд тэнцсэн хүмүүсийн нэрс болон бэлтгэл ангид суралцах эсэхийг шийдвэрлэх ярилцлагын цагийн хуваарийг 2012 оны 3 дугаар сарын 27-ны өдрийн 18.00 цагт МУИС-ийн хичээлийн 2 дугаар байрны зарлалын самбарт зарлана. Ярилцлагыг ОХУ-ын ЭСЯ болон Монгол Улсын БСШУЯ хамтран зохион байгуулна.
Оюутанд үйлчлэх төв
2012 оны 3 дугаар сар 2
