Монгол Улсад Биеийн тамирын тэнхимийг үүсгэн байгуулсаны 70 жилийн ой энэ онд тохиож байна. Монгол Улсын анхны Биеийн тамирын тэнхим нь 1948 онд МУИС-ийн ректорын тушаалаар Цэрэг-биеийн тамирын кабинет нэртэйгээр анх байгуулагдаж байсан түүхтэй. Тус тэнхимийн 70 жилийн ойн хүрээнд МУИС-ийн багш, ажилчдын спортын бага наадмыг зохион байгуулж байгаа бөгөөд өчигдөр /2018.01.14/ нээлтийн үйл ажиллагаа боллоо.
Спортын бага наадмын нээлтэд МУИС-ийн захирал, доктор Я.Төмөрбаатар, МУИС-ийн Эрдэм шинжилгээ, инноваци, гадаад харилцаа хариуцсан дэд захирал Б.Очирхуяг болон МУИС-ийн газар, хэлтэс, албадын дарга нар оролцов.
МУИС-ийн захирал, доктор Я.Төмөрбаатар нээлтэд хэлсэн үгэндээ “Оюуны ажил хийдэг манай багш, ажилтнуудад спортын арга хэмжээ ус, агаар шиг хэрэгтэй. Хөдөлгөөний дутагдлаас урьдчилан сэргийлэх, эрүүл мэнддээ анхаарах зэрэг олон ач холбогдолтой энэхүү тэмцээнд оролцож буй багш, ажилтнууддаа амжилт хүсье. Энэ удаагийн тэмцээний нэг онцлог нь манай ахмад багш, ажилтнууд баг бүрдүүлэн оролцож байна” гээд МУИС-ийн ШУС-ийн Ази судлалын тэнхимийн ахлах багш Т.Чахарт Пауэрлифтингийн Дэлхийн аварга цол хүртсэнд баяр хүргэн өргөмжлөл гардуулж МУИС-ийн фитнесс заалыг түүний нэрэмжит болгохоо дуулгалаа.
Спортын бага наадмын нээлтэд Монголын хүүхдийн ордны “Хөх Толботон” хамтлаг, Цэцэг хамтлагын дуучин Ч.Батболд нар ая дууны мэндчилгээ дэвшүүлж баг, тамирчдад амжилт хүсэв.
Тэмцээн 2018 оны 1 дүгээр сарын 22-ны өдөр өндөрлөнө.
