Өнөөдөр /2018.03.28/ МУИС-ийн хичээлийн бүх байрууд Монгол Улсын Засгийн газрын 2011 оны 339, 340 дүгээр тогтоолоор батлагдсан “Гамшгийн аюулын тухай зарлан мэдээллийн дохио дамжуулах журам”, “Гамшгийн үеийн дайчилгаа, нүүлгэн шилжүүлэх журам”-ын дагуу жил бүрийн 3 дугаар сарын 4 дэх пүрэв гарагийн 16:00 цагт гамшгийн аюулыг зарлан мэдээлэх дохиогоор дадлага сургуулийг зохион байгуулах ажлыг угтан Газар хөдлөлтийн аюулаас урьдчилан сэргийлэх, таниулах өдрийг тохиолдуулан гамшгийн аюулаас урьдчилан сэргийлэх, аюул ослын үед хэрхэн ажиллах талаар танхимын сургалтыг Онцгой байдлын ерөнхий газартай хамтран зохион байгууллаа.
Сургалтыг ОБЕГ-ийн ажилтан, ахмад Б.Ганболд хөтлөн явуулав.
Маргааш буюу 3 дугаар сарын 29-ны өдрийн 16.00 цагт гамшгийн аюулын зарлан мэдээллийн дуут дохио дуугарч дадлага сургуулийг зохион байгуулна. Уг сургуулилтад нийт багш, ажилтан, оюутнууд оролцох юм.
Эхний дуут дохиогоор төрийн захиргааны байгууллага, аж ахуй нэгж, гамшгаас хамгаалах улсын албад, ерөнхий боловсролын сургууль, цэцэрлэгүүд газар хөдлөлтийн үеийн аюулгүй ажиллагааны “Нуугд- Суу- Хүлээ” зарчмыг баримтлан өрөө тасалгаандаа аюул багатай байрлалд өөрийгөө хамгаалах арга хэмжээг авч, ширээн доогуур орох, даацын хана, булан тохойд зогсоно.
Хоёр дахь дохио дуугарсны дараа барилга, объектыг орхин гарахдаа гараараа болон гарын доорхи зүйл ашиглан толгойгоо хамгаалан “Гүйхгүй, Эргэж буцахгүй, Хашхирахгүй, Түлхэлцэхгүй” гэсэн зарчмаар барилгын аврах гарцаар гарч, аюулгүй зай талбайд цугларч дадлага сургуульд оролцох юм.
