МУИС дахь багш боловсролын оюутнуудын дунд жил бүр зохион байгуулагддаг эрдэм шинжилгээний хурал 4 дүгээр сарын 12-ны өдөр амжилттай болж өндөрлөлөө. Энэхүү хурал нь ШУС дахь багш боловсролын 8 хөтөлбөрийн 400 шахам оюутнуудын дунд жил бүр уламжлан болон зохион байгуулагдсанаар оролцогчид хоорондоо танилцах, хамтран ажиллах, мэдлэг мэдээллээ солилцох зэргээр хөгжих боломжийг олгодог, хүсэн хүлээдэг томоохон үйл явдлуудын нэг болоод удаж байна.
Энэ удаагийн хуралд 1-р шатанд 14 багийн 35 оюутан оролцож 2-р шатанд 10 багийн 26 оюутан судалгааныхаа үр дүнг танилцууллаа. Эдгээр оюутнуудад БССТэнхим, Физикийн тэнхимийн зүгээс гарын бэлэг, БУС-ын захирал Ц.Амартайванаас дурсамж гардуулав.
Биологи, байгал шинжлэлийн оюутнуудын хийсэн “Биологийн хичээлийн сурах бичгийн агуулгад хийсэн шинжилгээ”, “Сэтгэл зүй болон махбодын шийтгэл нь хүүхдийн хөгжилд нөлөөлөх нь” сэдэвт судалгаанууд ЕБС-ийн түвшинд тулгамдсан асуудлыг хөндсөн, сонирхолтой ажил болсныг шүүгчдийн зүгээс онцолж байв.
Мөн Түүх, нийгмийн ухааны багшийн 3-р түвшний оюутнуудын хэлэлцүүлсэн хөгжлийн бэрхшээлтэй оюутны сурч боловсрон хөгжихөд тулгамддаг асуудлуудын тухай судалгааны ажил тэр бүр бидний олж хараад байдаггүй асуудлыг хөндөж шийдвэрлэх арга замыг дэвшүүлснээрээ ач холбогдолтой ажил болсныг оролцогч багш нарын зүгээс онцлоод үр дүнгээ ШУС-ийн захиргаанд хүргүүлж цаашид бодит ажил болгох талаар хамтарч ажиллахыг хүслээ.
Хурлын төгсгөлд оюутнууд хоорондоо сонирхсон сэдвээр асуулт, хариулт өрнүүлж харилцан мэдээллээ солилцож танин мэдсэн, хөгжсөн үйл ажиллагаа болж өнгөрөв.
Хурлын үр дүнд 4 байр шалгаруулж ШУС-ийн зүгээс батламж, мөнгөн шагналаар урамшуулав. Хурлыг жилээс жилд чанартай болгохын тулд ШУС-ийн зүгээс онцгойлон анхаарч, орчин нөхцөл, удирдлагаар дэмжиж ажиллаж байгаад зохион байгуулах ажлын хэсэг болоод багш боловсролын нийт оюутнуудын зүгээс талархал илэрхийлье.
