Оюутны хөгжил, үйлчилгээний газраас хэрэгжүүлж буй “МУИС –ийн СОЁЛ” хөтөлбөрийн хүрээнд ХБНГУ-ын Ахмад Мэргэжилтний Байгууллагын (SES) гишүүн Бремений Их Сургууль, Якобсын Их Сургуулийн багш доктор Клаас Диетер Кнүүп 2018 оны 4 дүгээр сарын 27–ноос 5 дугаар сарын 18-ныг хүртэл / 3 долоо хоног/ зочин профессороор ажиллаа. Тэрээр МУИС –д суралцагчдад зориулан Европын орнуудын оюутны сайн дурын хөдөлгөөн ба олон улсын туршлага, европын их сургуулиуд дахь “Оюутан парламент”-ын үйл ажиллагаа, туршлага, чиг хандлага, залуучуудын хувь хүний хөгжил, төлөвшилд санаа өгсөн олон сэдвээр уулзалт ярилцлагыг хийлээ.
Доктор Клаас Диетер Кнүүп нь МУИС-д ажиллах хугацаанд 5 дугаар сарын 7,15-нд ХЗС –ийн оюутнуудад Европын орнуудын эрх зүйн эх сурвалж, ЕХУ –ын үндэсний хууль тогтоомж ба олон улсын нийтлэг эрх зүйн уялдаа холбоо, ЕХУ-ын эрүүгийн эрх зүй, эрүүгийн хуулийн сэдвээр, ОУХНУС-ийн оюутнуудад 4 дүгээр сарын 30, 5 дугаар сарын 2-ны өдрүүдэд Дипломат ёслол, олон улсын харилцаан дах Европын Холбоо, Европын Парламент зэрэг сэдвээр лекцийг тус тус уншлаа.
Мөн тэрээр ХЗС-ийн Нийтийн эрх зүйн тэнхимийн багш нартай 5 дугаар сарын 15-нд , ОУХНУС-ийн Олон улсын харилцааны тэнхимийн багш нартай 5 дугаар сарын 16-ны өдөр тус тус уулзалт хийж цаашид хамтран ажиллах талаар санал солилцлоо.
ОХҮГ-ын хэрэгжүүлж буй “МУИС –ийн СОЁЛ” хөтөлбөр нь МУИС-ийг хөгжүүлэх 2024 он хүртлэх стратеги төлөвлөгөөний дагуу тус газрын хамт олны зүгээс оюутныг нийгмийн хариуцлагатай, соёлтой, төлөвшилтэй иргэн болж төгсөхөд дэмжих ажлын нэгээхэн хэсэг юм.
ОЮУТНЫ ХӨГЖИЛ, ҮЙЛЧИЛГЭЭНИЙ ГАЗАР
