МУИС-ийн оюутан залуусын дунд “МУИС-ийн соёлыг төлөвшүүлье” уриатай шинэ санаа, санаачилгыг шалгаруулах “МУИС Хакатон 2018” уралдааны 48 цагийн хугацаа дуусахад 2 цаг үлдлээ. Энэхүү уралдаан МУИС-ийн тулгамдаж буй асуудлыг шинэлэг арга замаар шийдвэрлэх, суралцагч залуусын бүтээлч санааг дэмжих, тэднийг хөгжүүлэх, гарааны бизнесээ эхлүүлэх боломж, бололцоог бүрдүүлэх зорилготой юм.
“МУИС ХАКАТОН-2018” уралдаан 2018 оны 6 дугаар сарын 11-ний өдөр эхэлсэн бөгөөд өнөөдөр 10.30 цагт 48 цагийн турш МУИС-ийн үйлчилгээнд тулгамдаж буй асуудлыг шийдвэрлэх, сайжруулах, МУИС-ийн соёлыг төлөвшүүлэх шинэлэг санаагаа дэвшүүлж хөгжүүлэх хугацаа дуусч нийт багууд төслийн танилцуулгаа хийснээр шилдэг төслийг шалгаруулж уралдаан өндөрлөнө. Уралдаанд тэргүүлсэн багт тухайн төслийг хэрэгжүүлэх санхүүжилтийг олгох юм.
“МУИС- ХАКАТОН 2018” уралдаанд гарааны бизнес эхлүүлэгчдэд зориулсан оффис байгуулах, бие дааж суух анги танхимаа цахимаар захиалах хүснэгт нээх, МУИС-ийн нэгдсэн аппликейшн бий болгох зэрэг төслүүд оролцож байна.
