Монгол Улсын шатарчин, Увс аймгийн харъяат, “Хан-Алтай” клуб, МУИС-ийн Бизнесийн сургуулийн 3-р түвшний оюутан, Азийн Залуучуудын хошой аварга, МУ-ын аварга Ү.Үүрийнтуяа нь Их мастер цол авсан Монголын арав, эмэгтэйчүүдээс зургаа дахь шатарчин боллоо.
Лондон хотноо 2018 оны арваннэгдүгээр сарын 9-10-ны өдрүүдэд зохион байгуулагдсан Дэлхийн шатрын холбооны хурлаар Монгол Улсын шатарчин, Увс аймгийн харъяат, “Хан-Алтай” клуб, МУИС-ийн тамирчин, Азийн Залуучуудын хошой аварга, МУ-ын аварга Үүрцайхын Үүрийнтуяагийн Эмэгтэй Их мастер (WGM) цолыг албан ёсоор баталлаа. Ү.Үүрийнтуяа нь Их мастер цол авсан Монголын арав, эмэгтэйчүүдээс зургаа дахь шатарчин болж байна. Түүний багш, дасгалжуулагч бол Их Мастер Д.Шаравдорж юм. Ийнхүү 20 настай Ү.Үүрийнтуяа нь эл цолыг хүртсэн Монголын 10, эмэгтэйчүүдээс зургаа (түүнээс өмнө Гавьяат тамирчин Б.Мөнгөнтуул, Т.Батчимэг, А.Энхтуул, Д.Номин-Эрдэнэ, Б.Амина) дахь шатарчин болж байна.
Ү.Үүрийнтуяагийн өөрийн цахим хуудсандаа нийтэлсэн сэтгэгдэл:
Тамирчин хүнийхээ хувьд их мастер гэх энэ том цолонд хүрсэндээ маш их талархаж, баярлаж байна. Олон олон жилийн хүч хөдөлмөр, тэвчээр, инээд хөөр, бахархал, уйтгар гуниг, нулимс агуулсан цол юм шүү. Дунд нь шантраад, уйлаад ‘за би ер нь болилоо’ гэж бодох ч үе байсан. Тийм ч учраас шатрын спортоор амьдралаа зориулсан мундаг мастерууд, ажил төрлийнхөө хажуугаар энэ спортоороо хичээллээд явдаг ах эгч нарыгаа хүндэлж явдаг. Мэдлэгээсээ хуваалцаж байсан үе үеийн багш нартаа баярлалаа. Намайг шатрын спортод эргэлт буцалтгүйгээр оруулсан Хан-Алтай клубын Их мастер Шаравдорж дасгалжуулагчдаа мөн маш их баярлалаа. Хэцүү үеүдэд минь үнэт зөвлөгөөг өгдөг, өгсөөр ч байгаа Сараа эгчдээ баярлалаа. Мөн байнга хүүхдүүдийнхээ төлөө байдаг, бүх талаар тусалж дэмждэг, сайхан сэтгэлтэй, хөөрхөн ээждээ баярлалаа. Шатрын спортыг хөгжүүлэхийн төлөө чадах бүхнээ хийж буй Монголын шатрын холбоонд талархлаа илэрхийльее. Гэр бүлийнхэн, найз нөхөд, хамаатан садан, багш нартаа намайг ойлгож, дэмжиж тусалдагт баярлалаа.
