МУИС-ийн ХШУИС-ийн Электроникийн инженер болон Хүрээлэн буй орчны инженерчлэл, ТТДС-ийн инженер техникч бэлтгэх хөтөлбөрүүдэд инженерийн боловсролын CDIO арга зүйг нэвтрүүлэх үйл ажиллагаа болон МУИС-д Европын холбооны улсын санхүүжилттэй хэрэгжиж буй ERASMUS+ GREB (Green building) төслийн үзэл санааг амьдралд нэвтрүүлэх, түгээн дэлгэрүүлэх үйл ажиллагааны хүрээнд хийгдэж буй “Ухаалаг сууц” төслийн багийн 4 дэх удаагийн уулзалт хэлэлцүүлэг 2019 оны 4-р сарын 18-ны өдөр МУИС-ХШУИС-ийн 221 тоот хурлын өрөөнд болов. Хэлэлцүүлгийн үеэр 2 сургуулийн оюутнуудын холимог 3 багуудын дэвшүүлж буй байгальд ээлтэй, ухаалаг сууцны загвар болон био жорлон, саарал усыг шүүж авах шийдлийн талаарх хэлэлцүүлэг өрнөлөө.
Хоёр сургуулийн оюутнуудын холимог 3 багуудад ТТДС-ийн архитектурын ангийн оюутнууд нэмэгдэж оров. Дараагийн хэлэлцүүлгээр “Ухаалаг сууц” шийдэл болон монгол гэр хэлбэртэй загваруудын дулаан алдагдал болон цахилгаан зарцуулалтын харьцуулалт, удирдлагын системийн элементүүдийн сонголт, чадлын зарцуулалтын тооцоолол гаргах, шийдлээ хэрэгжүүлэх ажлыг гүйцэтгэхээр боллоо. Сургууль хоорондын, салбар дундын төслийн багийн гишүүддээ амжилт хүсье. Хоёр сургуулийн хамтын ажиллагаа цаашид улам бүр батжих болтугай.
