Оюутны програмчлалын үндэсний XI олимпиад дүнгээ гаргалаа

Share Button

Оюутны програмчлалын үндэсний XI олимпиад дүнгийн хурал 2019 оны 4 дүгээр сарын 29-нд МУИС-ийн 1-р байрны 320 тоот танхимд болж хуралд олимпиадыг зохион байгуулах комиссын дарга профессор Д.Гармаа, олимпиадыг зохион байгуулах комиссын гишүүн И.Бямбасүрэн, Г.Гантулга, Ч.Намуун-Эрдэнэ нар болон МУИС, ШУТИС, МУБИС, Шинэ Монгол ТДС-ийн багш оюутнууд оролцов.

Энэ удаагийн олимпиадад МУИС-ийн ХШУИС, ШУТИС-ийн МХТС, МУБИС-ийн Математик, Байгалийн Ухааны Сургууль, Шинэ Монгол Технологийн Дээд Сургууль, Улаанбаатарын Их Сургууль, Хүрээ Их Сургууль, Мандах Их Сургууль, Их Засаг ОУИС-ийн нийт 14 баг оролцож, 4 дүгээр сарын 27-нд өдрийн 12.00-17.00 цагийн хооронд 10 бодлогын програмыг бичиж оюун ухаан, хурд хүчээ сорьсон.

Багууд дараах амжилтыг гаргасан байна.

Багийн нэр Сургуулийн нэр Бодсон бодлого Бодолтод зарцуулсан хугацаа
1 SEAS2 МУИС, ХШУИС 8 1370
2 SEAS1 МУИС, ХШУИС 7 624
3 NMIT-1 ШМТДС 4 928
4 DBUG МУБИС, МБУС 3 424
5 SICT-1 ШУТИС, МХТС 2 485
6 SEAS3 МУИС, ХШУИС 2 599
7 SC3 Хүрээ Их Сургууль 1 119
8 SICT-2 ШУТИС, МХТС 1 232
9 MSM МУИС, ХШУИС 1 342

Эдгээр багуудаас МУИС-ийн ХШУИС-ийн Г.Гантулга дасгалжуулагчтай Г.Бат-Орших, Г.Золжаргал, Ж.Алтангэрэл нарын гишүүнтэй SEAS2 баг тэргүүн байранд, тус сургуулийн оюутан М.Билэгдэмбэрэл, А.Батжаргал, Ч.Төгөлдөр нарын гишүүнтэй SEAS1 баг дэд байранд, Шинэ Монгол ТДС-ийн М.Идэрбаатар дасгалжуулагчтай М.Энххүслэн, Б.Болдтөмөр, Б.Билгүүнбаяр нарын гишүүнтэй NMIT-1 баг 3-р байранд тус тус шалгарлаа. Олимпиадын тэргүүн байранд шалгарсан МУИС-ийн ХШУИС-ийн SEAS2, SEAS1 багт энэ намар 10-р сард болох Ази тивийн програмчлалын 44-р олимпиадад эх орноо төлөөлөн оролцох нэр төртэй бөгөөд хүндтэй эрх, үүрэг ноогдож байна.

Олимпиадад амжилттай оролцсон бүх багуудад олимпиадыг зохион байгуулах комисс баяр хүргэж сурлага, бүтээлийн их амжилтыг хүсэн ерөөж байна.