“Мэдлэгийн менежмент” улсын VII олимпиадад МУИС-ийн баг тэргүүн байр эзэллээ

Share Button

Хаана:                                      МУИС-ийн хичээлийн V байрны 106 тоот

Хэзээ:                                       2019.11.30 (Бямба гариг)

Зохион байгуулагч:                МУИС, Бизнесийн сургууль

Оролцогч сургуулиуд:           МУИС, Бизнесийн сургууль

                                                  Хөдөө аж ахуйн их сургууль, ЭЗБС

                                                  Хүмүүнлэгийн ухааны их сургууль, БС

                                                  Улаанбаатар эрдэм их сургууль

                                                  Санхүү, эдийн засгийн их сургууль

“Мэдлэгийн менежмент” улсын олимпиадыг МУИС-ийн Бизнесийн сургууль 7 дахь жилдээ 2019 оны 11-р сарын 30-ны өдөр амжилттай зохион байгууллаа. Энэ жилийн олимпиадад бизнесийн чиглэлээр сургалт, судалгаа явуулдаг улсын болон хувийн хэвшлийн 5 томоохон сургууль болох  МУИС-ийн Бизнесийн сургууль,  ХААИС-ийн Эдийн засаг бизнесийн сургууль, Санхүү эдийн засгийн их сургууль, Хүмүүнлэгийн ухааны их сургууль, Улаанбаатар эрдэм их сургууль тус тус оролцож ур чадвараа сорилоо.

Мэдлэгийн менежмент олимпиадын онцлог нь олон улсад хүлээн зөвшөөрөгдсөн Business Strategic Games программыг ашиглан цахим орчинд өрсөлдөж буй багууд бизнесийн шийдвэр гарган ур ухаанаа уралдаалдаг ба үнэлгээ автомат системээр хийгддэгээрээ шударга өрсөлдөөн болдог юм.

Энэ жилийн 7 дахь удаагийн олимпиадад МУИС-ийн баг нэгдүгээр байранд, ХУИС  хоёрдугаар байранд, СЭЗИС  гуравдугаар байранд тус тус шалгарлаа.

Олимпиадыг 2012 оноос эхлэн МУИС-ийн Бизнесийн сургуулийн Менежментийн тэнхимийн санаачилгаар зохион байгуулж ирсэн. Энэхүү олимпиадад  оролцогч сургуулиудын тоо жилээс жилд нэмэгдэж улам өрсөлдөөнтэй, багууд туршлагатай болж байгаа бөгөөд  олимпиадын цар хүрээ нэмэгдсээр байна.

Энэ удаагийн олимпиадад МУИС-ийн баг 104 оноо авч бусад багаа тэргүүлсэн бөгөөд дэлхийн чансаагаар үзвэл топ 100 багийн тоонд амжилттай орж байгаагаараа онцлогтой юм.

МУИС-БС-ийн Менежментийн тэнхим