2019 оны 12 сарын 6-ны өдөр МУИС-ийн Олон улсын харилцаа хөтөлбөрийн ажил олгогч-төгсөгч-оюутан-багш дөрвөн талт уулзалтыг зохион байгууллаа. МУИС-ийн 2024 он хүртэлх хөгжлийн стратеги төлөвлөгөөнд дэвшүүлсэн зорилгын хүрээнд олон улсын харилцаа хөтөлбөрийг олон улсын жишигт хүргэхэд зөвхөн удирдлага, профессор багш нараас гадна ажил олгогч, төгсөгч, оюутнуудын хамтын хичээл зүтгэл ч чухал үүрэгтэйг онцолж нээсэн үгэндээ ОУХНУС-ийн захирал С.Баттулга уг арга хэмжээний үеэр зөвхөн магтаал сайшаалаас гадна шүүмж санал нээлттэйгээр солилцож хөтөлбөрийг чанаржуулахад гар бие оролцохыг уриалсан юм.
Хөтөлбөрийн алсын хараа, эрхэм зорилгын хүрээнд “Олон улсын харилцаа хөтөлбөрийн хөгжил шинэчлэл” танилцуулах илтгэлийг тэнхмийн ахлах багш Г.Баасанхүү тавьсаны дараа зах зээлийн хэрэгцээ шаардлагыг тодорхойлох ажил олгогчдын төлөөлөл сонирхолтой илтгэлүүдийг оюутан, төгсөгчдөд тавилаа. Тухайлбал, ГХЯ-ны Төрийн захиргааны удирдлагын газрын дэд захирал Б.Баттүвшин, ШУА-ийн Олон улс судлалын хүрээлэнгийн эрдэмтэн нарийн бичгийн дарга, доктор Р.Төрдалай, Далайд гарцгүй хөгжиж буй орнуудын судалгааны төвийн үйл ажиллагаа хариуцсан захирал Д.Дөлгөөн, “Оюу толгой” ХХК-ийн Гадаад харилцааны ахлах зөвлөх Б.Өсөхбаяр нар төрийн байгууллагууд болон олон улсын компаний хүний нөөцийн бодлого, гадаад албаны ажилтнуудад тавигдаж буй мэдлэг, ур чадвар, хандлагын талаар танилцуулсан юм.
Төгсөгчдийн сэтгэгдэл хэсэгт 2014 оны төгсөгч Батлан хамгаалах эрдэм шинжилгээний хүрээлэнгийн судлаач Р.Нямдаваа “Судалгааны ур чадвараа хөгжүүлэхийн давуу тал” сэдвээр, 2017 оны төгсөгч ЮНЕСКО-ийн Монголын үндэсний комиссын мэргэжилтэн Г.Намуун “Миний эзэмшсэн ур чадвар ажлын байрны шаардлагад маань хэрхэн нийцдэг вэ” сэдвээр, 2011 оны төгсөгч “АНД глобал” олон улсын компаний Хамтын ажиллагаа хариуцсан захирал Э.Ренчиндорж “Клубын гишүүнчлэлээр хөгжсөн ур чадвар давуу тал минь болдог” сэдвээр оюутан дүү нартаа зориулан сонирхолтой сургамж дүүрэн яриа хийв. Уулзалтын үеэр “Оюу толгой” ХХК-ийн Хамтын ажиллагаа, мэдээлэл харилцааны газрын мэргэжилтэн Э.Эрдэнэсувд(2018 төгсөгч) тус компаниас залуус, оюутнуудад зориулан хэрэгжүүлдэг тэтгэлэгт хөтөлбөрүүд, дадлагын талаар сонирхолтой танилцуулга хийсэн юм.
Уулзалтад хүрэлцэн ирсэн төгсөгч шавь нар, ажил олгогчдод дэд профессор Ж.Баттөр өөрийн бүтээлүүдээсээ дурсгав. Мөн арга хэмжээний үеэр 2011 оны төгсөгч Э.Ренчиндорж “SRT клубын төгсөгчдийн нэрэмжит тэтгэлэг”-ийг 2019-2020 оны хичээлийн жилд идэвхтэй суралцаж буй дүү нартаа зориулан зарласан билээ. Арга хэмжээнд нийт 100 гаран оюутан, 40 гаран төгсөгч оролцсон байна. Дөрвөн талт уулзалт олон улсын харилцаа хөтөлбөрийн зах зээлийн хэрэгцээ шаардлагыг тодорхойлох, төгсөгчид, оюутнуудынхаа сэтгэл ханамжийг тодорхойлж хөтөлбөрийн шинэчлэлдээ тусгахад бодит нөлөөтэй ач холбогдол өндөр арга хэмжээ боллоо.
Олон улсын харилцааны тэнхим
