МУИС-ОУХНУС-ийн Нийтийн удирдлагын тэнхимээс төрийн удирдлагын хөтөлбөрөөр суралцаж буй оюутнуудын тухайн жилийн үйл ажиллагааг дүгнэх, хөтөлбөрийн төгсөгчдөөс сургуулиа хэрхэн амжилттай төгсөх, ажлын байранд шаардагдах ур чадварыг хэрхэн эзэмших зөвлөмж, туршлагаа оюутнуудтай нээлттэй ярилцах зорилгоор багш, төгсөгч, оюутны нэгдсэн уулзалтыг 2019.12.17-нд амжилттай зохион байгуулав.
Нэгдсэн уулзалтанд урилгаар:
- 2015 оны төгсөгч, АНУ-ын Аласкын их сургуулийн докторант Н.Цэрмаа,
- 2016 оны төгсөгч, ЭМДЕГ-ын санхүү, төлбөрийн хэлтсийн мэргэжилтэн Д.Булгантамир,
- 2017 оны төгсөгч, GIZ-IMRI төслийн мэргэжилтэн Б.Амгалан,
- 2018 оны төгсөгч, ЗГХЭГ-ийн Төр засгийн үйлчилгээг эрхлэх газрын ажилтан Г.Тэмүүлэн нар оролцон өөрсдийн туршлагаас хуваалцан, ярилцлага өрнүүлсэн нь сонирхолтой байв.
Арга хэмжээнд оролцсон төгсөгчиддөө талархал илэрхийлэн, цаашдын ажилд нь өндөр амжилт хүсье.
Оюутнуудыг төлөөлөн төрийн удирдлагын хөтөлбөрийн III түвшний оюутан Б.Нэмүүлэн суралцахад тулгарч буй бэрхшээлийг даван туулах боломжийг эрэлхийлж, суралцахад анхаарах зүйлсийг оюутнуудад дахин сануулсан нь энэхүү арга хэмжээний бас нэгэн онцлог байв. Түүнчлэн нийгмийн идэвх сайтай, олон нийтийн ажилд санаачлагатай оролцдог оюутнуудад тэнхимийн зүгээс батламж гардууллаа.
Нийтийн удирдлагын тэнхимийн шилдэг оюутан шалгаруулах журмын дагуу оны шилдэг оюутан шалгаруулах үйл ажиллагаа хоёр үе шаттай явагдлаа. Нэгдүгээр шатанд түвшин тус бүрийн оюутнуудын саналаар гурван оюутныг дараагийн шатанд нэр дэвшүүлж, хоёрдугаар үе шатанд тэнхимийн багш нараас бүрдсэн комиссын үнэлгээгээр оны шилдгүүдийг тодруулсан. Комиссын дүнгээр 2019 оны шилдэг оюутнаар сурлага, эрдэм шинжилгээ, олон нийтийн идэвхи оролцоогоор анги хамт олноо манлайлан оролцсон:
- Төрийн удирдлагын II түвшний оюутан О.Дашдондог,
- Төрийн удирдлагын III түвшний оюутан Б.Буянзаяа,
- Төрийн удирдлагын IV түвшний оюутан М.Батдорж нар шалгарлаа.
Шилдгээр шалгарсан, шилдэг оюутанд нэр дэвшсэн оюутнууддаа баяр хүргэж, төрийн удирдлагын хөтөлбөрийн нийт оюутнууддаа мэдлэгийг баялаг болгох үйлсэд нь амжилт, бүтээлийн дээдийг хүсье.
МУИС-ОУХНУС-ийн Нийтийн удирдлагын тэнхим
