2019 оны 12-р сарын 11-ний өдөр ОУХНУС-ийн 20 оюутан Монголын Эмнести Интернэшнл олон улсын байгууллагын бүтэц, үйл ажиллагаатай танилцлаа. Мөн тус байгууллагаас 25 жилийн ойдоо зориулан зохион байгуулсан “Хүний эрх, эрх чөлөө” хэмээх хүний эрх хэрхэн зөрчигдөж буйг илэрхийлсэн шог зургийн үзэсгэлэнг үзсэн юм. Уг үзэсгэлэнд Монголын шог зургийн томоохон төлөөлөгчдийн нийт зуу гаруй бүтээл байсан бөгөөд олон хүнд ухаарал, бодрол өгөх бүтээлүүд багагүй байв.
Тус байгууллагын “Залуучууд, активизм хариуцсан зохицуулагч Я.Цэцэнзаяа хэлэхдээ “Таныг явж байхад хэн нэгний эрх зөрчигдөж байвал та түүнийг тоохгүй орхиж болохгүй. Яагаад гэвэл, тэнд таны ч бас эрх зөрчигдөж байна” гэсэн юм.
Эмнести интернэшнл нь бидний адил сая сая эгэл жирийн хүмүүсээс бүрддэг олон улсын байгууллага бөгөөд 1961 оноос хойш хүний эрх, эрх чөлөөний төлөө тэмцэж буй олон улсын хөдөлгөөн юм. Тус байгууллага нь засгийн газар, бүлэг, хувь хүмүүсийн эрхийг хамгаалсан хууль боловсруулах, түүнийг өөрчилж шинэчлэхэд нь шахалт үзүүлж, одоо болон ирээдүй хойч үеийнхэнд хүний эрхийн боловсрол, мэдлэг, соёлыг түгээж хүн бүрийн эрхээ эдлэх мөрөөдлийг бодитой болгохын төлөө 150 гаруй оронд 7 сая гаруй гишүүд дэмжигчдийн хамтаар ажилладаг байна.
Түүнчлэн засгийн газар, улс төр, эдийн засаг болоод шашны үзэл бодлоос хараат бус байдгаараа онцлог бөгөөд улс төрийн нам, засгийн газруудаас санхүүжилт авдаггүй аж.
Эмнести интернэшнлийн үйл ажиллагаа нь:
- Хүн бүр эрхээ мэддэг, эрхээ хэрэгжүүлж чаддаг
- Хүн бүр хүний эрх, шударга ёсыг тэгш эдэлдэг
- Хямрал, зэвсэгт мөргөлдөөний үеэр энгийн иргэдийг хамгаалж чаддаг
- Хүний эрхийн зөрчил үйлдэгчдэд хариуцлага тооцдог дэлхий ертөнцийг цогцлоон бүтээхэд чиглэгддэг.
