2020 оны 2 дугаар сарын 26-ны өдрийн Засгийн газрын тогтоол, Улсын онцгой комиссын шийдвэрээр өндөржүүлсэн бэлэн байдлын хугацааг 2020 оны 3 дугаар сарын 30-ны өдрийг дуустал сунгалаа.
Улс оронд бий болсон онцгой нөхцөл байдлын үед сэтгэл зүтгэл гарган зайн, цахим сургалтыг идэвхитэй явуулж байгаа МУИС-ийн нийт 700 гаруй эрдэмтэн багш, судлаачид, цахим сургалтандаа идэвхитэй хамрагдаж байгаа 12000 гаруй суралцагч оюутнууддаа талархал дэвшүүлье.
Энэ хүнд бэрх цаг үед сургуулийн өдөр тутмын тасралтгүй үйл ажиллагааг ханган цаг наргүй ажиллаж байгаа нийт Захиргааны ажилтнууд, ялангуяа сургуулийн эмч, эмнэлгийнхэндээ, хичээлийн болон оюутны байрууд, бусад нэгжүүдэд өдөр бүр ариутгал халдваргүйжилтийн ажлыг тогтмол сэтгэл гарган хийж буй Хангамж, үйлчилгээний газрын ажилчид, зохион байгуулагч нар, үйлчилгээнийхэндээ талархаж буйгаа илэрхийлье.
Засгийн газрын шийдвэрийн дагуу 2020 оны 3 дугаар сарын 30-ныг дуустал хорио цээрийн дэглэм үргэлжлэх болсон тул багш бүр цахим сургалтаа улам бүр сайжруулан тасралтгүй чанартайгаар явуулж, суралцагч нэг бүртэй холбоотой байж зааж зөвлөн, оюутан бүр цахим хичээлдээ идэвхитэй оролцож багш нартайгаа холбогдож заавар зөвлөмжийг нь дагаж мөрдөн, Захиргаа болон Үйлчилгээний ажилтнууд илүү хичээн ажиллаж, аливаа саад бэрхшээлийг хамтдаа зөв хандлагаар ойлголцон, хүлээцтэй, тэвчээртэй даван туулахыг та бүхэндээ уриалж байна.
Хамтын хүчин чармайлт, хариуцлага, харилцан ойлголцох зөв хандлагаар энэхүү онцгой нөхцөл байдлыг өвчин зовлонгүй, халдвар тархалтгүйгээр даван туулах нь Монгол Улсын нийт ард иргэд, түүний дотор МУИС хэмээх их айлд хамаарах хүн бүрийн нэр төртэй үүрэг хариуцлага мөн.
Бид хамтдаа чадна гэдэгт итгэж байна.
МУИС-ийн Захиргаа
