МУИС-н Олон Улсын Харилцаа Нийтийн Удирдлагын Сургуулийн Нийтийн удирдлагын тэнхимийн “Public administration week” үйл ажиллагааны хүрээнд зохион байгуулагдсан “Мини Парламент” клубийн 2020-2021 оны хичээлийн жилийн нээлтийн чуулган 2020 оны 10 дугаар сарын 17-ны өдөр МУИС-н “Алтан аргамж” танхимд амжилттай зохион байгуулагдлаа.
Уг арга хэмжээнд ОУХНУС-ийн Нийтийн удирдлагын тэнхимийн багш нар уригдан оролцов. “Мини Парламент” клуб нь Нийтийн удирдлагын тэнхимийн Г.Мягмар багшийн санаачилгаар анх 2015 онд байгуулагдаж өдгөө 5 жил тасралтгүй үйл ажиллагаагаа явуулж байна. Тус клуб нь “Төрийн удирдлага” хөтөлбөрөөр суралцаж буй оюутнуудад хичээлээр үзэж буй онолын мэдлэгээ практикт ашиглах боломж олгодог ач холбогдолтой.
“Мини Парламент” клубийн гишүүдийг бүрдүүлэх, сургаж хөгжүүлэх, NUM PARLIAMENT, Төрийн албан хаагчийн загвар шалгалт зэрэг уламжлалт үйл ажиллагааг зохион байгуулахад удирдлага нь гишүүдээ чиглүүлэх, гишүүд нь бусадтайгаа хамтран ажиллаж аливаа хурал зөвлөгөөн, төсөл арга хэмжээг амжилттай гүйцэтгэж буй байдал нь клубийн гишүүдэд практик туршлагыг олгодог.
Клубийн удирдлагын бүрэн эрхийн хугацаа дүрэмд зааснаар 1 жил байдаг бөгөөд “Мини Парламент” клубийн дарга IV түвшний оюутан Б.Нэмүүлэн тус хугацаанд клубээ амжилттай удирдаж, “Төрийн удирдлага” хөтөлбөрийн III түвшний оюутан Х.Гүнбилигт-д үүрэгт ажлаа хүлээлгэн өгч, цаашдын ажилд нь амжилт хүсэв.
Клубийн гишүүний сонгон шалгаруулалтыг амжилттай давсан оюутнууд клубийн нээлтийн чуулганаар “Мини Их Хурлын гишүүн”-ий тангараг өргөж албан ёсоор гишүүнчлэлийн эрхээ гардан авдаг. Энэ хичээлийн жилд шинээр 6 гишүүн тангараг өргөв.
Ийнхүү нээлтийн чуулган зохион байгуулагдсанаар 2020-2021 оны хичээлийн жилийн “Мини Парламент” клубийн үйл ажиллагаа албан ёсоор эхэллээ. Мөн клубийн үйл ажиллагааг дэмждэг нийтийн удирдлагын тэнхимийн багш нар болон клубийг удирдаж, үйл ажиллагаанд нь идэвхтэй оролцож байсан үе үеийн дарга, гишүүд, хүндэт гишүүддээ талархал илэрхийлье.
Мини Парламент Клуб
