Монгол Улсын Их Сургууль, БНСУ-ын Солонгос сангийн хооронд байгуулсан ахисан түвшний оюутанд тэтгэлэг олгох гэрээ 2020 оны 12-р сард шинэчлэгдэн дахин 3 жилээр сунгагдлаа. Ковид 19 амаргүй нөхцөлд МУИС-ийн захиргаа, гадаад харилцааны хэлтэс, солонгос судлалын тэнхимийн багш нар шуурхай ажилласны хүчинд гэрээ байгуулан, МУИС-ийн Солонгос судлалын чиглэлээр суралцаж буй магистрант, докторантад тэтгэлэг олгох нөхцөлийг бүрдүүллээ.
Тэтгэлэгт нийт 12 оюутан материал ирүүлснээс гэрээнд заасан дагуу 5 оюутны материалыг шалгаруулан БНСУ-ын Солонгос санд илгээснээр эцсийн шийдвэр гарч, дараах оюутнууд тэтгэлэг авах болзлыг хангав. Үүнд: докторант Б.Сарнай, Б.Бүжинлхам, магистрант Т.Хулан, Г.Цогзолмаа, Д.Баттүвшин.
Солонгос сангийн ахисан түвшний оюутны тэтгэлэг гардуулах ажиллагаа 2021 оны 1 дүгээр сарын 25-ны өдөр болсон бөгөөд цомхон хүрээнд, халдвар хамгааллын дэглэмийг сахиж ажиллалаа. Тэтгэлэг гардуулах үеэр МУИС-ийн ШУС-ийн захирал Заяабаатар, уг тэтгэлэг МУИС-ийн ахисан түвшний оюутнуудын сургалт, судалгааны ажилд томоохон хувь нэмэр оруулдаг тэтгэлэг бөгөөд ШУС-ийн ХУС-ын Ази судлалын тэнхим, солонгос судлалын салбарын багш нарын идэвхи санаачлага, хичээнгүй ажиллагааны үр дүнтэй салшгүй холбоотойг цохон тэмдэглэв.
Тэтгэлэг авсан нийт оюутнууддаа эрдэм номын их үйлсэд нь өндөр амжилт хүсье.
